Avval xabar berilganidek, O‘zbekiston Milliy olimpiya qo‘mitasi va O‘zbekiston futbol federasiyasi prezidenti Umid Ahmadjonov ayni paytda Ispaniya poytaxti Madrid shahrida bo‘lib turibdi.
Umid Ahmadjonov kecha "Real" Madrid klubi prezidenti Florentino Peres, jamoa Bosh direktori Xose Anxel Sanches, klubning Tashqi aloqalar bo‘limi direktori Emilyo Butragenyo, "Stellar group" agentlik kompaniyasining Ispaniya va Portugaliya bo‘limi prezidenti Luis Alonso bilan ko‘rishgandi.
Bugun Ispaniya futbol federasiyasida uchrashuv bo‘lib o‘tdi va unda Umid Ahmadjonov Ispaniya FF Texnik direktori Fernando Yerro va Murabbiylar tayyorlash Qo‘mitasi direktori Eduardo Katurla bilan uchrashdi. Uchrashuv davomida O‘zbekiston Futbol federasiyasi va Ispaniya futbol federasiyasi o‘rtasida hamkorlik qilish bo‘yicha kelishuvga erishildi.
Kelishuvga ko‘ra enidilikda O‘zbekistonning 16 yoshgacha bo‘lgan terma jamoalari Ispaniyadagi ochiq chempionatlarda ishtirok etadi. Shuningdek, Superliga klublari vakillari Ispaniyaning “Real” Madrid, “Barselona” kabi kuchli jamoalariga safar uyushtirib, bu klublarning ish olib borish tizimi, infratuzilmasi, mashg‘ulotlar olib borish jarayonlari bilan yaqindan tanishadi.
Ispaniya FFning faoliyatini yaqindan o‘rganish maqsadida shu yilning mart oyida O‘zbekiston futbol federasiyasi delegasiyasini Ispaniyaga yuborish bo‘yicha ham kelishuvga erishildi. Shuningdek, Ispaniya FFdan ham delegasiya yurtimizga tashrif buyuradi. Ular tomonidan ajratilgan Texnik direktor yurtimizda bo‘lib, o‘zbek futbolini rivojdantirishning yangi tizimini yo‘lga qo‘yishga yordam beradi.
Endilikda O‘zbekiston futbol federasiyasi ham Ispaniya futbol federasiyasidagi tizim asosida ish olib boradi. Hattoki, O‘FFdagi shtat birliklarini ham Ispaniya FFdagi bilan bir xil asosda tashkil etish rejalashtirilgan.
Bugun Umid Ahmadjonov “Real Madrid” akademiyasi prezidenti Xulio Ronko bilan ham uchrashishi ko‘zda tutilgan.
