Xitoyda bo‘lib o‘tayotgan 23 yoshgacha futbolchilar o‘rtasidagi Osiyo chempionati finali uchrashuvi oldidan O‘zbekiston U-23 terma jamoasi bosh murabbiyi Ravshan Xaydarov o‘z fikrlari bilan o‘rtoqlashdi.

«Biz musobaqada hozirgacha beshta o‘yin o‘tkazdik va ularning har biri o‘zgacha bir tarix. Albatta, har qanday o‘yin o‘ziga yarasha saboq bo‘lishi mumkin, masalan qilgan xatolarimizni takrorlamaslikka harakat qilishimiz lozim. Ammo biz ortda qolgan o‘inlar bilan to‘xtab qolishimiz yaramaydi. Ularni unutib, e’tiborni shanba kuni bo‘ladigan finalga qaratishimiz kerak.

Ayni paytda bor e’tiborimizni finalda Vyetnamni yutishga qaratganmiz. Biz faqat g‘alaba haqida o‘ylayapmiz. Barcha jamoalar finalda o‘ynashni orzu qiladi, chunki bu juda muhim musobaqa. Final og‘ir kechishini payqash qiyin. Raqib ham o‘ziga yarasha kuchli jamoa. Bunday musobaqalarda kuchsiz jamoa o‘zidan-o‘zi finalga chiqib qolmaydi», deya Haydarovning so‘zlarini keltiradi OFK rasmiy sayti.