Avval xabar berganimizdek, “Navbahor” navbatdagi nazorat o‘yinini “Oq-tepa” jamoasiga qarshi o‘tkazdi.  Uchrashuvda "Navbahor" 3:1 hisobida g‘alaba qozondi.

Uchrashuvning birinchi bo‘limi yakunlanishi arafasida "Oq-tepa" futbolchilari hisobni ochishga erishishdi. Ikkinchi bo‘limni faollik bilan boshlagan futbolchilarimiz Azamat Allaniyozovning aniq zarbasidan keyin hisobni tenglashtirishdi. Goldan so‘ng jamoamizda gol urish uchun yaxshigina imkoniyatlar yuzaga keldi. Hujumlarning birini Ayubxon No‘’monov gol bilan yakunlab jamoamizni oldinga olib chiqdi. Hujumkorlikni susaytirmagan futbolchilarimiz uchinchi golni ham urishdi. Uchinchi golga Azamat Allaniyozov mualliflik qildi. Aslini olganda uchrashuvda yirik hisob qayd etilishi mumkin edi. Lekin, ko‘p hollarda to‘p "Oq-tepa" darvozasiga kirishni istamadi.

Uchrashuvda “Navbahor” tarkibi quyidagicha bo‘ldi: Akbar To‘rayev, Avazbek Mamatxo‘jayev, Tomislav Pajovich, Darko Stanoyevich, Ilhom Boydedayev, Oybek Qilichev, Oston O‘runov, Ayubxon No‘’monov, A’zam Aliyev, Behruz Sa’dillayev, Azamat Allaniyozov. Zaxiradan maydonga tushganlar: Ilya Gavrilov, Azizbek Turg‘unboyev, Dilshod Jabborov, Zohir Pirimov, Yannis Linda, Shohzamon Xayrullayev.

"Navbahor" FK matbuot xizmati.