Аввал хабар берганимиздек, “Навбаҳор” навбатдаги назорат ўйинини “Оқ-тепа” жамоасига қарши ўтказди. Учрашувда "Навбаҳор" 3:1 ҳисобида ғалаба қозонди.
Учрашувнинг биринчи бўлими якунланиши арафасида "Оқ-тепа" футболчилари ҳисобни очишга эришишди. Иккинчи бўлимни фаоллик билан бошлаган футболчиларимиз Азамат Алланиёзовнинг аниқ зарбасидан кейин ҳисобни тенглаштиришди. Голдан сўнг жамоамизда гол уриш учун яхшигина имкониятлар юзага келди. Ҳужумларнинг бирини Аюбхон Нўъмонов гол билан якунлаб жамоамизни олдинга олиб чиқди. Ҳужумкорликни сусайтирмаган футболчиларимиз учинчи голни ҳам уришди. Учинчи голга Азамат Алланиёзов муаллифлик қилди. Аслини олганда учрашувда йирик ҳисоб қайд этилиши мумкин эди. Лекин, кўп ҳолларда тўп "Оқ-тепа" дарвозасига киришни истамади.
Учрашувда “Навбаҳор” таркиби қуйидагича бўлди: Акбар Тўраев, Авазбек Маматхўжаев, Томислав Пажович, Дарко Станоевич, Илҳом Бойдедаев, Ойбек Қиличев, Остон Ўрунов, Аюбхон Нўъмонов, Аъзам Алиев, Беҳруз Саъдиллаев, Азамат Алланиёзов. Захирадан майдонга тушганлар: Илья Гаврилов, Азизбек Турғунбоев, Дилшод Жабборов, Зоҳир Пиримов, Яннис Линда, Шоҳзамон Хайруллаев.
"Навбаҳор" ФК матбуот хизмати.
