“Manchester Yunayted” klubi yarim himoyachisi Xuan Mata “Xaddersfild”ga qarshi uchrashuvda hakam Kevin Frendning VAR tizimi orqali kiritgan to‘pini inobatga olmaganiga munosabatlarini bildirib o‘tdi.

“Keyini bosqichga chiqish muhim edi. Vazifamiz bitta – yana “Uembli”da musobaqa bosh sovrinini qo‘lga kiritish hisoblanadi.

Inobatga olinmagan gol? O‘sha vaziyatda ofsayd borligini ochig‘ini tushuna olmay qoldim. Men raqib himoyachisi bilan bir chiziqda joylashgan edim. Gol urilgandan keyin odatdagidek nishonlashga hozirlangandim.

Keyin hakamning kim bilandir gaplashayotganiga ko‘zim tushdi va shu bilan u golni hisoblamadi.

Men VAR tizimi tarafdoriman, o‘ylaymanki, tizim futbolga faqat foyda keltiradi. Ayniqsa muhim qarorlar qabul qilishda juda asqotadi. Videotakrorlar tizimi o‘yinda halollik paydo bo‘lishiga biroz bo‘lsada yordam beradi. Ammo bugun kutilmagan qaror bizning zararimizga ishladi.

Yaxshiyamki, bu gol asosiy natijaga ta’sirini o‘tkazmadi, Biz baribir yakunda g‘alaba qozonishni uddalay oldik. “Manchester Yunayted” barcha savollarga doim kutilganidan ertaroq javob berishga o‘rgangan”, – deydi Mata.