Yevropa chempionlar ligasining nimchorak final bosqichidagi yana bir markaziy o‘yin bo‘lib o‘tdi. "Chelsi" va "Barselona" jamoalari o‘rtasida bo‘lib o‘tgan dastlabki o‘yindan keyin intriga saqlanib qoladigan bo‘ldi.

Antonio Konte o‘yinni nominal hujumchisiz boshlashga qaror qildi. U asosiy e’tiborni markazga qaratib, "Barsa"ga erkin o‘ynash imkoniyatini bermaslikni maqsad qildi. Buning natijasida "ko‘k-anorranglilar" tanaffusga qadar raqib mudofaasini yorib o‘ta olishmadi.

Uchrashuv davomida mehmonlar to‘ni 70 foiz vaqt davomida nazorat qilgan bo‘lsalar-da, birinchi bo‘limda mezbonlar 2ta qulay imkoniyatga ega bo‘lishdi. 33-daqiqada Villian 22 metrlardan zarba yo‘lladi. To‘p esa ustunga tegib qaytdi.  Birinchi bo‘lim tugashiga 4 daqiqa qolganida Villian bu ishni yana bir marta bajardi. Bu safar u 17 metrdan zarba berib, narigi ustunni nishonga oldi.

Ikkinchi bo‘limni kataloniyaliklar nisbatan faol boshlashdi. Ammo mezbonlar ishonchli himoyalanishda davom etishdi. Villian esa uchinchi urinishda o‘z maqsadiga erishdi. Braziliyalik yarim himoyachi jarima maydonchasi tashqarisidan shunday zarba berdiki, ter Shtegen to‘rga borib tushayotgan to‘pni tomosha qilishdan boshqa iloj topa olmadi.

Butun o‘yin davomida mudofaada ishonchli harakat qilgan "Chelsi" bir marta xatoga yo‘l qo‘ydi va bu qimmatga tushdi. Inyesta raqibdan to‘pni olib qo‘yib, jarima maydonchasiga kirdi va Messiga uzatma berdi. Leo aniq zarba bilan darvozani ishg‘ol qildi.

Shu tariqa, "Barselona" safarda golli durangga imzo chekdi. Ushbu to‘qnashuv taqdiri 14 mart kuni Barselonada hal bo‘ladi.

YECHL, nimchorak final, dastlabki o‘yin
Chelsi Angliya – Barselona Ispaniya 1:1 (0:0, 1:1)
Gollar: 1:0 – 62 Villian, 1:1 – 75 Messi.
Chelsi – Kurtua, Aspilikueta, Kristensen, Ryudiger, Mozes, Azar, Villian, Fabregas (Drinkuoter, 84), Kante, Pedro (Morata, 83), Alonso.
Barselona – ter Shtegen, Serdji Roberto, Pike, Umtiti, Alba, Paulinyo (Aleish Vidal, 63), Rakitich, Buskets, Inyesta (Andre Gomesh, 90), Messi, Suares.
Ogohlantirishlar: Rakitich (29), Suares (76), Ryudiger (80), Morata (86), Buskets (90).