Xabaringiz bor, avvalroq futbol bo‘yicha O‘zbekiston milliy terma jamoasi uchun xorijdan kuchli murabbiy olib kelinishi haqida ma’lum qilingandi. Shu maqsadda, O‘zbekiston Milliy olimpiya qo‘mitasi Prezidenti va mamlakat futbol assosiasiyasi birinchi vise-prezidenti Umid Ahmadjonov bugun erta tongda yangi bosh murabbiy bilan boshlangan muzokaralarni nihoyasiga yetkazish uchun Birlashgan Arab Amirliklarining Dubay shahriga jo‘nab ketdi.
Ma’lum qilinganidek, O‘zbekiston terma jamoasining yangi bosh murabbiyi xorijlik kuchli mutaxassis, jahon futbolidagi top murabbiy bo‘ladi. Ayni paytda u o‘z terma jamoasini Rossiyada o‘tkaziladigan jahon chempionatiga tayyorlamoqda. Bilasiz, xar bir murabbiy shartnomasi tugashiga 6 oy qolganida yangi takliflarni ko‘rib chiqishga va muzokaralar o‘tkazishga haqli. Shu sababdan ham, yangi bosh murabbiy bilan terma jamoamiz masalasida yakuniy kelishuvga erishildi.
Biroq, u ayni paytda o‘z shogirdlarini iyun oyida boshlanadigan mundialga tayyorlayotgani sababli, jahon chempionati yakuniga qadar nomi hozircha e’lon qilinmasligini so‘radi. O‘zining bu iltimosini mutaxassis jahon chempionati oldidan uning shogirdlari kayfiyatiga salbiy ta’sir ko‘rsatishi mumkinligi bilan izohladi. Umid Ahmadjonov yangi bosh murabbiyning bu iltimosini qabul qildi va iyul oyiga qadar uning nomi futbol jamoatchiligiga e’lon qilinmasligiga va’da berdi.
Eng muhimi mutaxassis bilan yakuniy to‘xtamga kelindi va u Rossiyadagi mundialdan so‘ng mamlakatimizga tashrif buyuradi hamda O‘zbekiston milliy terma jamoasi boshqaruvini rasman qo‘lga oladi. Unga qadar esa mamlakatimizning bosh jamoasi O‘zbekiston futbol assosiasiyasi qoshida yangi tashkil etilgan murabbiylar kengashi qo‘l ostida o‘quv-mashg‘ulot yig‘inlari va belgilangan o‘rtoqlik uchrashuvlarini o‘tkazadi.
Shunisi aniqki, yurtimiz futbol muxlislari milliy terma jamoamizning yangi bosh murabbiyini juda yaxshi bilishadi va O‘zbekiston futbol assosiasiyasi rahbariyatining bu tanlovidan benihoya hursand bo‘lishadi. Tabiiyki yangi bosh murabbiy oldiga Osiyo kubogi-2019 da muvaffaqiyatli ishtirok etish va terma jamoamizni 2022 yilda Qatarda bo‘lib o‘tadigan jahon chempionatiga olib chiqish vazifasi qo‘yiladi. Voqealar rivojini biz bilang kuzatib boring.
