Yengilatletika sport kurashlari va velosport bo‘yicha Osiyo chempionatida sovrindor bo‘lgan o‘zbekistonlik sportchilar bugun Milliy olimpiya qo‘mitasi tomonidan mukofotlandi.

Xabaringiz bor, fevral oyida yengil atletikachilarimiz Eronda, velosport terma jamoamiz a’zolari Malayziyada, kurashchilarimiz esa Qirg‘izistondagi Osiyo chempionatida ishtirok etib, sovrinli o‘rinlarni qo‘lga kiritgandilar. Shu munosabat bilan mazkur nufuzli musobaqalarda oltin medalni qo‘lga kiritgan sportchilar Milliy olimpiya qo‘mitasi tomonidan 15 million, kumush medal sohiblari 10 million, bronza medallariga sazovor bo‘lgan vakillarimiz esa 5 million so‘mdan pul mukofoti bilan taqdirlanishdi.

Milliy olimpiya qo‘mitasi shuningdek, ushbu sportchilarni tarbiyalagan murabbiylarni ham e’tibordan chetda qoldirmadi va o‘z navbatida ularga ham pul mukofotlari taqdim etildi. Mukoftlarni o‘z egalariga MOQ Prezidenti Umid Ahmadjonov va Jismoniy tarbiya va sport vaziri Shoakrom Isroilovlar topshirishdi. Tadbirdan so‘ng Bishkekdagi Osiyo chempionatida oltin medalni qo‘lga kiritgan erkin kurashchimiz Ixtiyor Navro‘zov o‘z taassurotlari bilan o‘rtoqlashdi.

"Bishkekdagi natija men uchun katta g‘alaba bo‘ldi. Chunki, so‘nggi marotaba 2011 yilda umumjamoa hisobida mana shunday muvaffaqiyatga erishgandik. Ushbu natijani yetti yil o‘tib yana takrorlay oldik. Bu muvaffaqiyatlar o‘z-o‘zidan qo‘lga kiritilgani yo‘q. Buning tagida katta mehnat yotibdi. Jamoamiz yosh ekanligiga qaramay, musobaqada katta hajmdagi ishni bajardi va medallar shodasiga ega chiqdi. 3ta oltin, 2ta kumush va 3ta bronza medaliga sazovor bo‘lib, umumjamoa hisobida birinchi bo‘la oldik. Navbatdagi musobaqalarda ushbu ko‘rsatkichimizni yanada yaxshilashga harakat qilamiz.

Osiyo o‘yinlaridagi imkoniyatlarimiz haqida gapiradigan bo‘lsam, biz va bizdan tajribali bo‘lgan sportchi akalarimiz birgalikda harakat qilib, yoshlarga to‘g‘ri yo‘l ko‘rsata olsak, nasib qilsa kelajakda ular bizdan ham yaxshiroq ko‘rsatkichlarni qayd eta oladilar. Navbatdagi Olimpiya o‘yinlarida biz yanada yaxshi natija qayd etmoqchimiz va o‘zbek xalqini xursand qilamiz.

Milliy olimpiya qo‘mitasining ushbu rag‘bati kelajakdagi musobaqalar uchun mas’uliyatni yanada oshiradi. Chunki, bu biz uchun yaxshigina ko‘mak, yordam bo‘ladi. Bunday e’tibor sportchi uchun juda muhim. E’tibor kuchaygani sari, bizning harakatimiz, mas’uliyatimiz va natijalarimiz ham yaxshilanib boraveradi. Bunday rag‘bat tajribali sportchilar uchun ham, yoshlar uchun ham zarur. Chunki, ular shu sohaning nonini yeydi.

Nufuzli musobaqalarda madhiyangizni eshitsangiz... Buni tasvirlab berib bo‘lmaydi. O‘sha lahzada uzoq qilingan mehnat zoye ketmaganini, xalq oldida yuzingiz yorug‘ bo‘lganini sezasiz. Barcha charchoqlar chiqib ketadi. Har bir sportchiga mana shunday nufuzli musobaqalarda, shu jumladan, Olimpiya o‘yinlarida g‘olib chiqish nasib qilsin", - dedi Ixtiyor Navro‘zov.

Shuningdek, yengil atletikachimiz, Osiyoning uch karra chempioni, IV “Islom birdamlik o‘yinlari” g‘olibi Nadiya Dusanova ham ushbu e’tibordan xursand ekanligini yashirib o‘tirmadi.

"Men uchun yil omadli boshlandi. Navbatdagi musobaqalarga jiddiy tayyorgarlik ko‘ryapmiz. Ayni paytda Osiyo o‘yinlariga Dukentda taraddud ko‘rmoqdamiz. Bizni oldinda to‘rt yillikning eng muhim starti kutib turibdi. Sovrinli o‘rinlarni qo‘lga kiritish uchun oxirigacha kurashamiz.

Bugungi taqdirlash marosimi kutilmagan xol bo‘ldi. Qo‘ng‘iroq qilib, Milliy olimpiya qo‘mitasiga taklif etishdi. Nima munosabat bilan chaqirishganini ham bilmadim. Kelsak, mana shunday yoqimli holat guvohiga aylandik. Osiyo chempionatidagi muvaffaqiyatimiz evaziga mukofotlandik. Bunday e’tibor uchun Milliy olimpiya qo‘mitasiga katta minnatdorchilik bildirmoqchiman", - dedi Nadiya Dusanova.

Tadbir yakunida MOQ Prezidenti Umid Ahmadjonov so‘z olib, Milliy olimpiya qo‘mitasi bundan keyin ham xalqaro maydonda, nufuzli musobaqalarda yurtimiz sharafini munosib himoya qiladigan sportchilar va ularning ustozlarini har tomonlama qo‘llab quvvatlab, rag‘batlantirib borishga tayyor ekanligini ma’lum qildi. 

Bugungi tantanali marosimida jami 20 nafar sportchi va xuddi shuncha murabbiy bir martalik pul mukofotlari bilan taqdirlanishdi.