Xosep Gvardiola boshchiligidagi "Manchester Siti" klubi muddatidan 6 tur avval Angliya chempionligini qo‘lga kiritishi mumkin edi. Ular bunga juda yaqin turishgandi...

Mourinyo boshchiligidagi "MYU" dastlabki 25 daqiqa davomida himoyada ishonchli himoyalanishdi. Aynan shu daqiqada burchakdan yetkazib berilgan uzatmani Vensan Kompani bosh bilan de Xea qo‘riqlayotgan darvozaga joylab qo‘ydi. Oradan 5 daqiqa o‘tib mezbonlarning yana bir kombinasiyasi samarali yakunlandi. De Xea to‘pni o‘yinga kiritishda muvaffaqiyatsiz harakat qildi. Sterling ikki himoyachi orasida to‘pni o‘tkazib Gyundoganga yetkazdi. Ilkay qolgan futbolchilarni chalg‘itib, darvoza tomon aniq zarba berdi. 2:0.

Tanaffusga qadar hisob yirik ko‘rinishga kelishi mumkin edi. Ammo Rahim Sterling ikki marta birga-bir vaziyatdan foydalana olmadi. Har safar uning zarbalaridan keyin to‘p to‘sin ustidan o‘tib ketdi. Keyinchalik ma’lum bo‘ldiki, mana shu vaziyatlardagi gollar "Siti"ga qanchalar zarur edi.

Go‘yoki hammasi hal bo‘lgandi, yana 45 daqiqadan so‘ng "Siti" chempionlikni nishonlashi kerak edi. Ammo ular g‘alabaga muddatidan avval ishonib yuborishdi shekilli, ikkinchi bo‘lim boshida hammasi o‘zgarib ketdi. Pol Pogba ikki daqiqa ichida 2ta gol urib, tezda muvozanatni tiklab qo‘ydi. Dastlab  Sanches chap qanotdan ikki futbolchidan o‘tib ketdi, jarima maydonchasiga uzatma berdi. Matich ko‘kragi bilan to‘pni Pogbaning yo‘liga tashlab berdi. Pol birga-bir vaziyatda darvozani ishg‘ol qildi. Keyingi hujumda ham asosiy ishni chililik futbolchi bajarib berdi.  Sanchesning superpasidan keyin fransiyalik futbolchi bosh bilan darvozani ishg‘ol etdi!

Ushbu gollar "Man. Siti"ni ancha dovdiratib qo‘ydi. Ular o‘ziga kelmasidan avval "MYU" yana bir marta raqib darvozasini ishg‘ol etdi. Aleksis Sanches jarima to‘pini o‘yinga kiritdi va Kris Smolling yaqin masofadan to‘pni darvozaga joylab qo‘ydi.

So‘nggi daqiqalarda "shaharliklar" hisobni tenglashtirishlari mumkin edi. Burchak to‘pi o‘yinga kiritilgan pallada Aguero zarba berdi. Darvozaga kirayotgan to‘p yo‘nalishini Sterling o‘zgartirishga qaror qildi va to‘p ustunga tegib qaytdi.

Shu tariqa, "Manchester Yunayted" hamshaharlarining chempionlik quvonchini kamida navbatdagi turga qoldirishga muvaffaq bo‘lishdi. Gvardiola jamoasi esa ketma-ket ikkinchi o‘yinda yutqazmoqda, ketma-ket ikkinchi o‘yinda 3ta gol o‘tkazmoqda.

APL, 33-tur
Manchester Siti – Manchester Yunayted 2:3 (2:0, 0:3)
Gollar: 1:0 – 25 Kompani, 2:0 – 30 Gyundogan, 2:1 – 53 Pogba, 2:2 – 55 Pogba, 2:3 – 69 Smolling.
Manchester Siti – Ederson, Otamendi, Kompani, Danilo, Sterling, Gyundogan (Aguero, 76), Bernardu Silva (Gabriel Jezus, 72), Silva (de Bryuyne, 72), Sane, Fernandinyo, Delf.
Manchester Yunayted – De Xea, Bayi, Smolling, Valensiya, Yang, Pogba, Matich, Lingard (Maktomini, 85), Errera (Lindelef, 90), Sanches (Reshford, 82), Lukaku.
Ogohlantirishlar: Errera (37), Lukaku (45), Sterling (63), Fernandinyo (79), Aguero (79), Pogba (81), Danilo (90), Kompani (90), Gabriel Jezus (90).