Superliganing 6-turidagi “Nasaf” - “Lokomotiv” bahsi, turning markaziy uchrashuvi sanaladi.
Uchrashuv 11 aprel chorshanba kuni “Markaziy” stadionida bo‘lib o‘tadi va soat 20:00da boshlanadi.
O‘zbekiston Superligasi-2018. 6-tur
“Nasaf” (Qarshi) – “Lokomotiv” (Toshkent)
11.04.2018. “Markaziy” stadion. 20:00da
Bosh hakam: Ilgiz Tantashev (Buxoro)
Qanot hakamlari: Husniddin Shodmonov (Buxoro), Aleksandr Burov (Buxoro)
Zaxira hakami: To‘rabek Suyunov (Guliston)
Nazoratchi: Marat Ismoilov (Toshkent)
Uchrashuv komissari: Laziz Qo‘chqorov
O‘zaro uchrashuvlar tarixiga oid
Ushbu jamoalar milliy chempionatda 26 marta to‘qnash kelishgan. O‘tgan uchrashuvlarning 13 tasida “ajdarlar” g‘alaba qozongan. 5 uchrashuvda murosa ko‘chasi tanlangan. Qolgan 8 uchrashuvda “temiryo‘lchilar”ning qo‘li baland kelgan. To‘plar nisbati bo‘yicha ustunlik “Nasaf” tomonida 37-27.
Bu jamoalar o‘rtasidagi uchrashuvlarda “Nasaf” – “Lokomotiv” 5:1 (2 marta), “Lokomotiv” – “Nasaf” 5:2 ko‘rinishidagi eng yirik hisoblar qayd etilgan.
“Nasaf” bu yilgi chempionatda 5ta uchrashuv o‘tkazib, 9 ochko to‘pladi va turnir jadvalining 3-pog‘onasida bormoqda. “Lokomotiv” jamoasi 5 uchrashuvdan so‘ng 5 ochko to‘plab, turnir jadvalida 9-pog‘onasida bormoqda. Amaldagi mamlakat chempionning bu yilgi chempionatda unchalik omadi chopmayapti.
Qarshidagi o‘zaro uchrashuvlarga oid
Mazkur jamoalar Qarshida shu paytgacha 13 marta o‘zaro kuch sinashganlar. Bu uchrashuvlarning 9tasida g‘alaba qozongan, 3 uchrashuvda “Lokomotiv”ning qo‘li baland kelgan, qolgan 1 uchrashuvda durangga imzo chekilgan. Qarshidagi o‘zaro uchrashuvlarda jami darvozalarga 41ta to‘p kiritilgan, to‘plar nisbati - 26-15ni tashkil etmoqda. Demak, to‘plar nisbati bo‘yicha ham ustunlik qarshiliklar tomonida.
“Nasaf” o‘tgan yilgi chempionatda “Lokomotiv”ni Qarshida 2:0 hisobida mag‘lubiyatga uchratgan. Uchrashuvdagi ikki golga ham hujumchi Dragan Cheran mualliflik qilgan. “Lokomotiv” jamoasi esa so‘nggi bor, 2016 yili Qarshidagi uchrashuvda 2:1 hisobida “Nasaf”dan ustun kelgan.
Qarshidagi so‘nggi besh uchrashuv natijalari
2017 yil. “Nasaf” - “Lokomotiv” 2:0
2016 yil. “Nasaf” - “Lokomotiv” 1:2
2015 yil. “Nasaf” - “Lokomotiv” 1:0
2014 yil. “Nasaf” - “Lokomotiv” 2:5
2013 yil. “Nasaf” - “Lokomotiv” 2:1
Uchrashuvga oid yana ma’lumotlar
Bu jamoalarning o‘rtasidagi bo‘lib o‘tgan har bir uchrashuv futbol ishqibozlarida katta qiziqish o‘yg‘otib keladi. Bu safar ham oldindan uchrashuvni shunday o‘tishini taxmin qilsa bo‘ladi.
Bo‘lajak uchrashuv, “Nasaf”ning milliy chempionatdagi 624-uchrashuvi bo‘ladi.
Mazkur jamoalar o‘tgan 5-tur uchrashuvida durangga erishdi. “Lokomotiv” – “Qo‘qon-1912” 1:1, “Navbahor” – “Nasaf” 0:0. “Ajdarlar” o‘tgan ikki turda durang qayd etishdi. Bu safar “Nasaf” o‘z maydonida uch ochko uchun kurashishi turgan gap. Bu ham o‘yinning keskin bo‘lishiga sabab bo‘ladi.
“Lokomotiv” jamoasi bu uchrashuvga jiddiy yo‘qotishlar orqali tashrif buyuradi. Jamoaning ikki nafar yetakchi o‘yinchisidiskvalifikasiya tufayli maydonga tusha olmaydi. Bular Ikrom Aliboyev va Rodriges Nivaldolardir.
Mamlakatining OCHL ishtirokchilari sanalgan mazkur jamoalar, OCHL-2018 guruh bosqichining so‘nggi tur uchrashuvi oldidan tuqnash kelishmoqda. Bu uchrashuvdagi ijobiy natija jamoalarga ruhiy dalda ham beradi. “Nasaf”ning bu uchrashuvda g‘alaba qozonishi uchun yaxshigina imkoniyati bor. Chunki “ajdarlar” o‘z muxlislari ko‘z o‘ngida to‘p tepishadi.
Eslatib o‘tamiz, “Nasaf” - “Lokomotiv” jamoalari o‘rtasidagi uchrashuv 11 aprel chorshanba kuni “Markaziy” stadionda soat 20:00da boshlanadi. Mazkur jamoalarning o‘rinbosarlari o‘rtasidagi uchrashuv esa 10 aprel seshanba kuni Sputnik qo‘rg‘onidagi yoshlari qarorgohi maydonida soat 16:30da boshlanadi.
Barcha futbol ishqibozlarini ushbu qiziqarli uchrashuvga chorlab qolamiz.
