Avval xabar berilganidek, O‘zbekiston Milliy olimpiya qo‘mitasi prezidenti va O‘zbekiston futbol federasiyasi 1-vise-prezidenti Umid Ahmadjonov FIFA prezidenti Janni Infantino bilan uchrashuv davomida O‘zbekistonda futbolni yangi bosqichga olib chiqish, yosh avlod orasida futbolni yanada ommaviylashtirish, O‘zbekistondagi futbol muxlislariga Jahon futboli yulduzlari ishtirokidagi uchrashuvlarni bevosita stadionlardan tomosha qilish imkoniyatini taqdim etish borasida FIFAning amaliy yordam berishini so‘ragandi.
Shunga asosan FIFA prezidenti Janni Infantino o‘zbekistonlik futbol muxlislari uchun shu yilning 14 iyun-15 iyul kunlari Rossiyada bo‘ladigan Jahon chempionati uchun chiptalar taqdim etishga qaror qildi. Endilikda o‘zbekistonlik futbol ishqibozlari yozda bo‘lib o‘tadigan mundial bahslarini bevosita stadionlardan tomosha qilib, Jahon futboli yulduzlari ishtirokidagi bahslardan bahra olishlari mumkin bo‘ladi.
Chiptalar soni cheklangan bo‘lib, faqatgina eng faol futbol muxlislariga taqdim qilinadi. Buning uchun Superliga bahslaridan o‘rin olgan uchrashuvlarga tashrif buyuring, o‘zingizning sevimli jamoangizni bevosita stadiondan turib qo‘llab-quvvatlang va Jahon chempionati o‘yinlari uchun chiptalarni qo‘lga kiriting!
Eng faol muxlislarga Jahon chempionati chiptalari qay tartibda taqdim qilinishi haqida keyinroq batafsil ma’lumot beriladi.
