Rio 2016 Olimpiya o‘yinlari va Jahon chempionati sovrindori, Osiyo chempioni Murodjon Ahmadaliyev Milliy olimpiya qo‘mitasiga tashrif buyurib, tashkilot rahbari Umid Ahmadjonov bilan uchrashdi.
Uchrashuv davomida bokschi AQSHda olib borayotgan professional faoliyati, u yerda o‘tkazgan ikkita jangi, navbatdagi rejalari haqida gapirib berdi.
O‘z o‘rnida Umid Ahmadjonov huddi Shahram G‘iyosovdek, Murodjonni ham Tokioda o‘tkaziladigan Olimpiya o‘yinlarida ko‘rish istagi bor ekanligini ma’lum qildi.
Murodjon Ahmadaliyev esa bunga javoban, agar imkoniyat tug‘iladigan bo‘lsa jon deb Yaponiyadagi o‘yinlarda terma jamoamizga yordam berishini aytib o‘tdi.
Eslatib o‘tamiz, kecha Umid Ahmadjonov boshqa bir bokschimiz Shahram G‘iyosov bilan uchrashuv o‘tkazgani va uning Olimpiya o‘yinlarida ishtirok etishi mumkinligi haqida xabar qilgandik.
Milliy olimpiya qo‘mitasi matbuot xizmati ushbu uchrashuvdan so‘ng Murodjon Ahmadaliyev bilan eksklyuziv intervyu uyushtirdi. Ushbu suhbatni birozdan so‘ng e’tiboringizga havola etamiz.
