“Navbahor” – “Qizilqum” jamoalari o‘rtasidagi uchrashuvdan so‘ng matbuot “Navbahor” klubi bosh murabbiyi Ilhom Mo‘minjonov o‘yin haqida fikrlarini bildirib o‘tdi.
“Avvalo jamoamiz muxlislarini bugungi qiyin g‘alaba bilan tabriklayman. Shogirdlarim bugun ko‘rsatmalarimni to‘liq ravishda ado etib, tarkibimizdagi asosiy 3 nafar futbolchimizning yo‘qligini bildirishmadi va o‘z irodalarini namoyish etib, g‘alaba qozonishga muvaffaq bo‘lishdi.
O‘rinbosarlar tarkibidan mahalliy futbolchilarni asosiy tarkibga jalb etish borasida to‘xtaladigan bo‘lsam, yoshlar jamoamizning o‘z murabbiyi bor – Shuhrat aka Qoraboyev.
Biz bu mutaxassisga to‘liq ishonamiz. Shuhrat aka yosh futbolchilarni tarbiyalab, asosiy tarkibga yetkazib bermoqda va yoshlar tarkibidan yangi o‘yinchilar 2-davrada va kelasi yili sekin-asta asosiy tarkibdan joy olishadi, degan umiddaman.
Biz har bir uchrashuvda raqibga va o‘yinning qanday kechishiga qarab, tarkibda o‘zgarishlarni amalga oshiramiz. Jizzaxdagi o‘yinda o‘zgarishlar o‘z samarasini bermagan, aksincha, 14 daqiqa ichida o‘z darvozamizdan 3ta to‘p olib chiqqandik. Bugungi bahsda esa o‘zgarishlar o‘z samarasini berdi.
Hozircha shu tarkib bilan 15-turgacha o‘ynab turamiz va u yog‘ini vaqt ko‘rsatadi.
Albatta, izlanshda va ishlashda davom etamiz va safardagi kuchli raqiblarga qarshi kechadigan bahslarda ham zafar quchib, muxlislarni xursand etishga intilamiz”, - deydi Ilhom Mo‘minjonov.
