“Навбаҳор” – “Қизилқум” жамоалари ўртасидаги учрашувдан сўнг матбуот “Навбаҳор” клуби бош мураббийи Илҳом Мўминжонов ўйин ҳақида фикрларини билдириб ўтди.
“Аввало жамоамиз мухлисларини бугунги қийин ғалаба билан табриклайман. Шогирдларим бугун кўрсатмаларимни тўлиқ равишда адо этиб, таркибимиздаги асосий 3 нафар футболчимизнинг йўқлигини билдиришмади ва ўз иродаларини намойиш этиб, ғалаба қозонишга муваффақ бўлишди.
Ўринбосарлар таркибидан маҳаллий футболчиларни асосий таркибга жалб этиш борасида тўхталадиган бўлсам, ёшлар жамоамизнинг ўз мураббийи бор – Шуҳрат ака Қорабоев.
Биз бу мутахассисга тўлиқ ишонамиз. Шуҳрат ака ёш футболчиларни тарбиялаб, асосий таркибга етказиб бермоқда ва ёшлар таркибидан янги ўйинчилар 2-даврада ва келаси йили секин-аста асосий таркибдан жой олишади, деган умиддаман.
Биз ҳар бир учрашувда рақибга ва ўйиннинг қандай кечишига қараб, таркибда ўзгаришларни амалга оширамиз. Жиззахдаги ўйинда ўзгаришлар ўз самарасини бермаган, аксинча, 14 дақиқа ичида ўз дарвозамиздан 3та тўп олиб чиққандик. Бугунги баҳсда эса ўзгаришлар ўз самарасини берди.
Ҳозирча шу таркиб билан 15-тургача ўйнаб турамиз ва у ёғини вақт кўрсатади.
Албатта, изланшда ва ишлашда давом этамиз ва сафардаги кучли рақибларга қарши кечадиган баҳсларда ҳам зафар қучиб, мухлисларни хурсанд этишга интиламиз”, - дейди Илҳом Мўминжонов.
