Avvalroq, O‘zbekistonga Madridning “Real” klubi akademiyasi menejerlari Andres Antonio hamda Xuan Pablolar tashrif buyurishgani haqida xabar bergan edik. O‘zbekiston Milliy olimpiya qo‘mitasi prezidenti va O‘zbekiston futbol federasiyasi birinchi-vise prezidenti Umid Ahmadjonov “Real Madrid” akademiyasi menejerlarini qabul qilib, fikrlarini bo‘lishdi.

“Yurtimizga hush kelibsizlar. Sizlarni O‘zbekistonda ko‘rib turganimizdan xursandmiz. “Real” akademiyasida bo‘lib qaytganimizga ham ko‘p bo‘lmadi. U yerda klub akademiyasi prezidenti bilan uchrashdik. O‘zbekistonda “Real” akademiyasi ochilishini eshitib xalqimiz juda xursand bo‘ldi. Xabaringiz bor, ayni paytda La Liga bilan hamkorlikda ish olib boryapmiz. Ispaniya futboliga butun dunyo havas qiladi. O‘zbek futboliga ham Ispaniyaning yo‘lini bersin deb qolamiz. Hamkorligimiz orqali o‘zbek futbolini yuqori darajaga ko‘tarish umididamiz”, dedi Umid Ahmadjonov.

Jismoniy tarbiya va sport vaziri Shoakrom Isroilov “Real” bilan hamkorlik qilish O‘zbekiston uchun qiziq bo‘lishi haqida gapirdi.

“Ispaniya futboli to‘g‘risida nafaqat O‘zbekiston, balki butun dunyoda juda yaxshi bilishadi. O‘zbekistonda ham futbol maktablari bor, endi biz ushbu maktablarni yanada rivojlantirmoqchimiz. Mamlakatimiz rahbari ham bolalar uchun ixtisoslashtirilgan futbol akademiyalarini tashkil qilish borasida oldimizga bir qancha vazifalarni qo‘yganlar. Shuning uchun, bu borada Yevropa mamlakatlari bilan muzokaralar olib boryapmiz. “Real”ning bu boradagi tajribasi biz uchun juda qiziqarli. MOQ va O‘FA rahbariyati tomonidan ham futbolni rivojlantirish bo‘yicha ishlar amalga oshirilmoqda. O‘ylaymizki, bu ishlar kelajakda albatta o‘z mevasini beradi”, dedi Shoakram Isroilov.

Ertaga ispaniyalik mutaxassislar “Bunyodkor” stadioniga tashrif buyurib, u yerdagi shart-sharoitlar bilan tanishgandan so‘ng ular ishtirokida soat 11:00 da OAV vakillari uchun matbuot anjumani tashkil qilinadi.