O‘zbekiston futbol assosiasiyasi yurtimizda malakali murabbiylarni tayyorlash, ularning saviyasini muntazam ravishda oshirib borish yo‘nalishida bir qator chora-tadbirlarni amalga oshirmoqda. 

Shu maqsadda O‘FA mutaxassislari tomonidan yurtimizning turli viloyatlarida OFK va O‘FAning murabbiylik lisenziyalariga ega mutaxassislarning kasbiy malakasini aniqlash bo‘yicha seminarlar tashkil qilinayotgani haqida avval xabar berib o‘tgandik. 

Ana shunday seminarlar Andijon va Samarqand viloyatlarida bo‘lib o‘tdi.   

Bugun Farg‘onada ham murabbiylarning kasbiy malakasini aniqlash bo‘yicha seminar boshlandi.  Kun davomida murabbiylar nazariy sinovlardan o‘tishdi. 23-26 may kunlari esa murabbiylardan amaliy imtihonlar olinadi. 

Amaliy imtihonlar davomida murabbiylarning mashg‘ulotlar olib borishga qanday tayyorgarlik ko‘rganliklari, maydonni mashg‘ulotga tayyorlash, mashg‘ulot davomida bolalarga ko‘rsatmalar berib borish usuli, murabbiyning mashg‘ulot davomida o‘zini tutishi, futbolchilarning mashg‘ulotdagi xatolarini ko‘rsatib borish va o‘sha xatoni to‘g‘irlash borasida amalga oshiradigan xatti-harakatlari sinovdan o‘tkaziladi.