FIFA 2026 yilda bo‘ladigan jahon chempionati mezbonligiga da’vogarlik qilayotgan mamlakatlar tayyorgarligiga baho berdi, deya xabar tarqatdi AP.

Manbaga ko‘ra, AQSH, Kanada va Meskikaning qo‘shma arizasi 5 ballik tizimda 4 ballga baholandi. Marokash esa tekshiruv natijalari bo‘yicha 2,7 ball oldi. Imkoniyatlar 2 balldan past baholanganda ariza bekor qilinar edi.

FIFA inspektorlarining ogohlantirishicha, Marokash davlati musobaqani o‘tkazish uchun yetarli infratuzilmaga ega emas. Shimoliy Amerika mamlakatlaridagi ishlab turgan stadionlar va mehmonxonalar Mundial talablariga javob beradi.

Bundan tashqari, tekshiruvchilar Marokashdagi inson huquqlari bilan bog‘liq vaziyatga ahamiyat qaratishdi. AQSH esa musobaqaga tashrif buyuradigan muxlislarning kamsitilishini oldini olish borasida FIFAga kafolat berdi. Boisi, Donald Trampning migrasiya siyosati ko‘pchilik futbol federasiyalarida norozilik kayfiyatini uyg‘otyapti.

Shimoliy Amerikada o‘tadigan turnirdan olinadigan daromad 14,3 milliard dollarga baholanayotgan bo‘lsa, Marokashda bu ko‘rsatkich 7,2 milliard dollarni tashkil etishi taxmin qilindi.

JCH-2026 o‘tadigan mamlakat nomi FIFAning 13 iyun kuni Moskvada o‘tadigan Kongressida e’lon qilinadi. Bu musobaqada ilk marta 48ta terma jamoa ishtirok etishi kutilmoqda. Jamoalar 16ta guruhga bo‘linadi va dastlabki ikkita o‘rinni egallagan jamoa pley-off bosqichiga yo‘l oladi.