O‘zbekiston terma jamoasi o‘z tarixida ilk marta Janubiy Amerika terma jamoasiga qarshi o‘rtoqlik uchrashuvini o‘tkazdi. Montevideo shahrida bo‘lib o‘tgan Urugvayga qarshi o‘yinda terma jamoamiz yirik hisobda imkoniyatni boy berdi.

Bahsning dastlabki 30 daqiqasini Temur Kapadze shogirdlari juda yaxshi o‘tkazishdi. Futbolchilarimiz to‘pni yaxshi nazorat qilgan holda, raqibga xavfli hujum uyushtirish imkoniyatini berishmadi. Ammo 31-daqiqada maydon markazida to‘pnin yo‘qotilishi natijasida hisob ochildi. To‘pni egallagan Suares birgina uzatma bilan Kavanini yakkama-yakka vaziyatga chiqardi. Edinson Suyunovni aldab o‘tib, 11 metrli nuqta atrofiga uzatma berdi. Luis Suares to‘pni egalladiyu, yonida turgan de Arraskayetaga pas berdi. Jorjian kuchli zarba bilan darvozani ishg‘ol qildi.

Ikkinchi bo‘limning starti vakillarimiz uchun omadsiz kechdi. Mezbonlarning hujumi paytida to‘p kutilmaganda Rustam Ashurmatovning qo‘liga tegdi. Hakam esa penalti belgilashga qaror qildi. Luis Suaresning zarbasini Eldorbek Suyunov qaytara olmadi.

Mazkur gol o‘yinchilarimizning ruhiyatiga salbiy ta’sir ko‘rsatdi shekilli, jamoamiz to‘pni birinchi bo‘limdagidek nazorat qila olmadi. Boz ustiga, o‘yinning 73-daqiqasida uncha murakkab bo‘lmagan vaziyatda gol o‘tkazib yubordik. Burchakdan yetkazib berilgan to‘pga na Suyunov chiqdi, na himoyachilarimiz Ximenesning bosh bilan zarba berishiga xalal berishdi — 3:0.

Uchrashuv tugashiga 11 daqiqa qolganida Akrom Komilov raqibga nisbatan qo‘pol harakat qilgani bois maydondan chetlatildi. Shu tariqa, Jahon chempionatiga yo‘l olayotgan Urugvay maydonida yirik hisobda yutqazdik.

O‘rtoqlik o‘yini
URUGVAY – O‘ZBEKISTON - 3:0
8 iyun, 04.00, «Sentenario» stadioni
Gollar: Jorjian de Arraskayeta (32), Luis Suares (53-penalti), Ximenes (73)
Urugvay: Fernando Muslera, Maksimiliano Pereyra, Diyego Godin (S), Xose Mariya Ximenes, Martin Kasares, Naxitan Nendes, Rodrigo Bentankur, Matias Vesino, Jorjian de Arraskayeta, Luis Suares, Edinson Kavani
O‘zbekiston: Eldorbek Suyunov, Shuhrat Muhammadiyev (Abbos Otaxonov 59), Sherzod A’zamov, Rustam Ashurmatov, Akrom Komilov, Azizjon G‘aniyev (Ikrom Aliboyev 73), Odil Hamrobekov (Xurshid G‘iyosov 73), Javohir Siddiqov (San’at Shixov 81), Aziz Turg‘unboyev (Jasur Yaxshiboyev 59), Jaloliddin Masharipov, Zabihillo O‘rinboyev (Bobur Abduxoliqov 46)
Chetlatish: Akrom Komilov (79)