Ispaniyalik tennischi Rafael Nadal Fransiya ochiq chempionati – “Rolan Garros”da navbatdagi g‘oliblikni qo‘lga kiritdi. Ayni vaqtda jahon reytingining eng yuqori pog‘onasini egallayotgan Nadal musobaqa finalida 8-raqamli tennischi Dominik Timni 6:4, 6:3, 6:2 hisobida mag‘lub etib, ushbu nufuzli musobaqaning 11 karra g‘olibiga aylandi.
Nadal, shuningdek, “Katta dubulg‘a” seriyasiga kiruvchi musobaqalarning 17 karra g‘olibi bo‘ldi. Undan bu borada 20 ta unvonga ega shveysariyalik Rojer Federergina oldinda. “Rolan Garros”dagi g‘oliblik bo‘yicha esa hozircha “tuproqli kortlar qiroli” Nadalning oldiga tushadigani yo‘q.
Ayollar o‘rtasida ushbu musobaqada jahonning birinchi raqamli ayol tennischisi, ruminiyalik Simona Xalep g‘olib bo‘ldi. Bu uning “Katta dubulg‘a” musobaqalarida qo‘lga kiritgan ilk unvoni bo‘ldi.
