Kecha, 11 iyun kuni Ostona shahrida “Qozog‘iston prezidenti sovrini uchun” musobaqasida ishtirok etgan o‘zbekistonlik bokschilar vatanga qaytdi. Ularni Islom Karimov nomidagi “Toshkent” xalqaro aeroportida kutib oldik.
 
Musobaqaning chorak finalida hindistonlik raqibi Lalbiakkima Nutlaiga mag‘lubiyatga uchragan Hasanboy Do‘stmatovning fikrlari bilan qiziqdik.
 
“Musobaqa biz uchun og‘ir o‘tdi. Chunki, to‘y sabab tayyorgarliklarga ham vaqt bo‘lmadi (kuladi). Qachondir bunday holatga tushishimiz lozim edi. Bunday kunlar hozir kelgani yaxshi bo‘ldi. Chunki, Osiyo o‘yinlarigacha qiyinchilik bo‘lishi kerak edi. So‘nggi jangimni qishda o‘tkazgandim. Hindistonlik raqibga qarshi jangdagidek holat Osiyo o‘yinlarida sodir bo‘lganida bu yaxshi bo‘lmasdi. Musobaqa davomida Osiyo o‘yinlaridagi bo‘lajak raqiblarim imkoniyatini ham o‘rgandik.
 
Osiyo o‘yinlariga tayyorgarlik jarayonidan ko‘nglimiz to‘ldi. Aytib o‘tganimdek, ortda qolgan musobaqalarda raqiblarimizni yaxshi o‘rganib oldik. Endi navbatdagi janglar osonroq bo‘ladi. Tayyorgarlik yaxshi kechmoqda. Yaqinda Tailanddagi turnirda ham qatnashamiz, so‘ngra Osiyo o‘yinlariga jo‘nab ketamiz. Nasib qilsa Osiyoda Riodagidan ham yaxshiroq natija ko‘rsatamiz”, dedi Hasanboy Do‘smatov.
 
Ma’lumot uchun, musobaqada Bektemir Meliqo‘ziyev oltin, Shunqor Abdurasulov va Iqboljon Xoldorov kumush, Shaxobiddin Zoirov, Aliyor Noraliyev, Mahmud G‘oipov va Isroil Madrimovlar bronza medali sohibiga aylandi.