Xabar berib o‘tganimizdek, Milliy olimpiya qo‘mitasi rahbari Umid Ahmadjonov boshchiligidagi ishchi guruh Qashqadaryo viloyatiga tashrif buyurdi. Ishchi guruh tashrifni Qarshi shahridagi “Muruvvat” nogiron bolalar uchun internat uyi va 1-son asab-ruhiy kasalliklar dispanseridan boshlagani haqida ham ma’lum qilib o‘tdik.

Sir emaski, O‘zbekiston Milliy olimpiya qo‘mitasi Respublikamizdagi barcha Olimpiya zaxiralari kollejlari faoliyatini qayta ko‘rib chiqish, isloh qilishga katta ahamiyat qaratmoqda. Unga ko‘ra, ushbu o‘quv dargohlarida qabul kvotalaridan tortib, sportchilarning ovqatlanish rasioniga qadar alohida e’tibor qaratiladi.

Reja bo‘yicha, Olimpiya zaxiralari kollejlari terma jamoalarimizning asosiy bazasi bo‘lib xizmat qilishi lozim. Umid Ahmadjonov boshchiligidagi delegasiyaning navbatdagi tashrifi ham aynan Qarshi ixtisoslashtirilgan Olimpiya zaxiralari maktab internatiga bo‘ldi. U yerda MOQ rahbari berilgan topshiriqlar ijrosi bilan tanishdi. Kollejda sportchilar uchun yaratilayotgan sharoitlar, mashg‘ulotlar, o‘quv jarayonlari ko‘zdan kechirildi. So‘ngra MOQ rahbari qashqadaryolik paralimpiya sportchilari bilan uchrashdi. Ular bilan muloqot qildi va dardu-tashvishlarini tingladi. Paralimpiyachilarning sport bilan shug‘ullanishlari uchun sharoitlarni yanada yaxshilash lozimligi, bunga alohida e’tibor qaratish zarurligi haqida gapirdi.

Shuningdek, maktab hududida yangi qurib bitkazilgan suv havzasidagi sharoitlar, qurilayotgan inshootlar bilan tanishildi. Yuzaga kelgan muammo va kamchiliklarni bartaraf etish bo‘yicha Umid Ahmadjonov mutasaddilarga tegishli ko‘rsatmalarni berdi.

So‘ngra MOQ rahbari “Nasaf” jamoasining uy arenasi hisoblangan "Markaziy" stadioniga tashrif buyurib, u yerda kechayotgan qurilish va ta’mirlash ishlari, shart-sharoitlar bilan tanishdi. Shundan so‘ng ishchi guruh sobiq "Mehnat" o‘yingohi o‘rnida qurilayotgan sport majmuasi hamda ko‘ptarmoqli suzish havzasiga ham tashrif buyurdi va qurilish loyihasini ko‘zdan kechirdi.

Umid Ahmadjonov majmua qurilishi loyihasini ko‘zdan kechirar ekan, inshoot bu yerga tashrif buyuruvchilar talabiga javob bera olishi lozimligi, eng zamonaviy xalqaro standartlar asosida bunyod etilishi lozimligi haqida gapirdi. MOQ rahbarining Qashqadaryo viloyatiga xizmat safari davom etadi.