Хабар бериб ўтганимиздек, Миллий олимпия қўмитаси раҳбари Умид Аҳмаджонов бошчилигидаги ишчи гуруҳ Қашқадарё вилоятига ташриф буюрди. Ишчи гуруҳ ташрифни Қарши шаҳридаги “Мурувват” ногирон болалар учун интернат уйи ва 1-сон асаб-руҳий касалликлар диспансеридан бошлагани ҳақида ҳам маълум қилиб ўтдик.
Сир эмаски, Ўзбекистон Миллий олимпия қўмитаси Республикамиздаги барча Олимпия захиралари коллежлари фаолиятини қайта кўриб чиқиш, ислоҳ қилишга катта аҳамият қаратмоқда. Унга кўра, ушбу ўқув даргоҳларида қабул квоталаридан тортиб, спортчиларнинг овқатланиш рационига қадар алоҳида эътибор қаратилади.
Режа бўйича, Олимпия захиралари коллежлари терма жамоаларимизнинг асосий базаси бўлиб хизмат қилиши лозим. Умид Аҳмаджонов бошчилигидаги делегациянинг навбатдаги ташрифи ҳам айнан Қарши ихтисослаштирилган Олимпия захиралари мактаб интернатига бўлди. У ерда МОҚ раҳбари берилган топшириқлар ижроси билан танишди. Коллежда спортчилар учун яратилаётган шароитлар, машғулотлар, ўқув жараёнлари кўздан кечирилди. Сўнгра МОҚ раҳбари қашқадарёлик паралимпия спортчилари билан учрашди. Улар билан мулоқот қилди ва дарду-ташвишларини тинглади. Паралимпиячиларнинг спорт билан шуғулланишлари учун шароитларни янада яхшилаш лозимлиги, бунга алоҳида эътибор қаратиш зарурлиги ҳақида гапирди.
Шунингдек, мактаб ҳудудида янги қуриб битказилган сув ҳавзасидаги шароитлар, қурилаётган иншоотлар билан танишилди. Юзага келган муаммо ва камчиликларни бартараф этиш бўйича Умид Аҳмаджонов мутасаддиларга тегишли кўрсатмаларни берди.
Сўнгра МОҚ раҳбари “Насаф” жамоасининг уй аренаси ҳисобланган "Марказий" стадионига ташриф буюриб, у ерда кечаётган қурилиш ва таъмирлаш ишлари, шарт-шароитлар билан танишди. Шундан сўнг ишчи гуруҳ собиқ "Меҳнат" ўйингоҳи ўрнида қурилаётган спорт мажмуаси ҳамда кўптармоқли сузиш ҳавзасига ҳам ташриф буюрди ва қурилиш лойиҳасини кўздан кечирди.
Умид Аҳмаджонов мажмуа қурилиши лойиҳасини кўздан кечирар экан, иншоот бу ерга ташриф буюрувчилар талабига жавоб бера олиши лозимлиги, энг замонавий халқаро стандартлар асосида бунёд этилиши лозимлиги ҳақида гапирди. МОҚ раҳбарининг Қашқадарё вилоятига хизмат сафари давом этади.
