Xabar berib o‘tganimizdek, Janubiy Koreyaning Chungju shahrida akademik eshkak eshish bo‘yicha yoshlar o‘rtasida Osiyo chempionati va kattalar o‘rtasida Osiyo Kubogi musobaqasi bo‘lib o‘tmoqda.

Kecha o‘tkazilgan bahslarda hamyurtlarimiz 4ta oltin, 1ta kumush va 1ta bronza medallarini qo‘lga kiritganliklari haqida xabar berib o‘tgandik.

Musobaqaning bugungi kuni ham sportchilarimiz uchun muvaffaqiyatli kechdi.

O‘smirlar musobaqasining JM4 yo‘nalishida startga chiqqan o‘zbekistonlik sportchilar (Evgeniy Agafonov, Davrjon Davronov, Toir Tolibov, Shuxrat Shodiyev) marraga birinchi bo‘lib yetib borishdi va oltin medalni qo‘lga kiritishdi. JM4x yo‘nalishidagi bahslarda qatnashgan ekipajimiz (Jasur Turg‘unov, Sultonali Abduvaliyev, Dilmurod Ismatullayev, Azizbek Narzimurodov) bronza medaliga sazovor bo‘ldi.

Kattalar o‘rtasidagi bellashuvlarning M8+ yo‘nalishida ham oltin medal o‘zbekistonlik sportchilar (Zafar Usmonov, Shohjahon Najmiyev, Islambek Mambetnazarov, Shexroz Xakimov, Alisher Yarov, Anatoliy Krasnov, Otamurod Rahimov, Dostonjon Baxriyev, Dostonjon Xursanov) ga nasib qildi. Yana bir oltin medal M4X bellashuvlarida terma jamoamiz (SHaxboz Abdujabborov, Abdullo Muxammadiyev, O‘ktamjon Davronov, Farrux Astanov) hisobiga yozildi. E’tiborlisi, ushbu yo‘nalishda kumush medal ham o‘zbekistonlik sportchilar (SHaxboz Xolmurzayev, Bekzod Xolmirzayev, Abubakir Uzoqbayev, Jasur Mavlonov)ga nasib qildi. LM1x yo‘nalishida qatnashgan Jasur Mavlonov ham terma jamoamiz hisobiga bronza medalini qo‘shib qo‘ydi.

Shu tariqa, sportchilarimiz Osiyo chempionatida umumiy hisobda 7ta oltin, 2ta kumush va 3ta bronza medallarini qo‘lga kiritishdi.

O‘zbekiston Milliy olimpiya qo‘mitasi ushbu muvaffaqiyat bilan sportchi va murabbiylarimizni tabriklab qoladi va yaqinlashib kelayotgan Osiyo o‘yinlarida ham bundan kam bo‘lmagan muvaffaqiyatlarni kutadi.