Portugaliya terma jamoasi yarim himoyachisi Bernardu Silva Urugvayga qarshi uchrashuvdan so‘ng intervyu berdi. O‘sha bahsda 1:2 hisobida imkoniyatni boy bergan portugaliyaliklar jahon chempionatini tark etishdi.
- Aslida yomon o‘ynamadik. Ayniqsa, ikkinchi bo‘limda, - deydi Silva. - Vaziyatlar yuzaga keltirdik. Gol urishni juda istagandik. Afsuski, ikkinchi golni urolmadik.
Urugvayni keyingi bosqichga chiqqani bilan tabriklayman. Ajoyib jamoa. Tarkibida jismonan kuchli va mahoratli futbolchilar jamlangan.
- Uchrashuvga Edinson Kavani qanday ta’sir o‘tkazdi?
- O‘zingiz ham guvohi bo‘lganingizdek, u hujum chizig‘ida katta mehnat qildi. Shuningdek, himoyaga ham o‘tib turdi. Umuman olganda, hujumchilar himoyaga kamdan-kam hollarda qaytishadi.
Kavani esa universal. Jamoasi g‘alabasiga o‘zining ulkan ulushini qo‘shdi. Shuningdek, bizga ham yetarlicha tashvish tug‘dirdi.
- O‘yindan so‘ng Krishtianu Ronaldu kiyinish xonasida nimalar dedi?
- Nima deganini eshitmadim. Chunki flesh-intervyu berayotgandim. Lekin barchaning kayfiyati yo‘qligi shundoq ham ma’lum edi. Guruh bosqichidagi uchta uchrashuvda ham bor imkoniyatimizni ishga sola olmagandik.
Shunga qaramay, mag‘lubiyatga uchramagandik. Menimcha, 1|8 finalda turnirdagi eng yaxshi o‘yinimizni namoyish qildik. Lekin mag‘lub bo‘lib, musobaqani tark etdik. Bu kishini xafa qiladi. Biroq futbol o‘zi shunaqa.
- Ronaldu 33 yoshda. U terma jamoadagi faoliyatini davom ettiradimi?
- Bilmasam. Bu qanday qaror chiqarishiga bog‘liq. Terma jamoadagi sherigi sifatida Ronalduning qolishini istardim, u fantastik futbolchi. Iste’dodini to‘liq ta’riflash uchun so‘z topish ham mushkul. Ronaldu yoshi o‘tgani sabab energiyasini yo‘qotgan, deb hisoblamayman. U ajoyib mavsumni o‘tkazdi.
Chempionlar Ligasida ko‘plab gollar urdi, turnirda qatorasiga uch marta zafar quchdi. Joriy yilgi jahon chempionatida esa to‘rtta uchrashuvda to‘rtta gol urdi. Menimcha, u yildan-yilga kuchayib bormoqda. Ronalduning qolishiga ishonaman. Lekin Krishtianuning qanday qarorga kelishini vaqt ko‘rsatadi.
- Sizningcha, qaysi terma jahon chempioni bo‘ladi?
- Bu faqat jismoniy holatga emas, balki psixologiyaga ham bog‘liq. Fransiya, Braziliya kabi jamoalarning imkoniyatlari ancha yaxshi. Ammo Urugvay, Xorvatiya, Angliya kabi termalar ham bor. Ular syurpriz hadya qilishlari mumkin.
InterFutbol.uz ning Telegram dagi sahifasiga ulaning – eng so‘nggi yangiliklar, qiziqarli bloglar va tahliliy materiallar endi bir to‘plamda.
