.jpg)
Namangandagi “Markaziy” o‘yingoh anjumanlar zalida yig‘ilish o‘tkazildi. Unda "Navbahor" PFK rahbariyati va ishchi-xodimlari, "Markaziy" o‘yingoh rahbariyati hamda ishchi-xodimlari, "Navbahor" jamoasi muxlislari ishtirok etishdi. Yig‘ilishni Namangan viloyat hokimining birinchi o‘rinbosari Alisher Fayzullayev olib bordi. Alisher Tursunbayevich o‘z so‘zida mamlakatimiz, xususan, viloyatimizda sport, shu jumladan, futbolga katta e’tibor qaratilayotganligi, Namanganning “Navbahor” klubi oldiga joriy mavsumda yuksak maqsad qo‘yilganligini ta’kilab, jamoada transferlar “oynasi” vaqtida yuz bergan o‘zgarishlarga to‘xtalib, “Navbahor”ning o‘z oldiga qo‘ygan maqsadiga yetishiga tilak bildirdi. Shundan so‘ng, tashkiliy masala ko‘rildi. Unga ko‘ra, “Huquqiy Jamiyat” nashriyoti ta’sischisi, “Mashimpeks” xoldingi vise-prezidenti Shamshod Ergashovich Sarikov viloyat futbol assosiasiyasi vise-prezidenti etib tayinlandi.
Alisher Fayzullayev Shamshod Sarikovga yangi lavozimida omad yor bo‘lishini tiladi.
So‘ngra Namangan viloyat futbol assosiasiyasi 1-vise-prezidenti Bahrom Xolmirzayev so‘zga chiqib, Shamshod Sarikovga yangi lavozimida omad yor bo‘lishiga tilak bildirdi.
Shundan so‘ng, Shamshod Ergashovich so‘z olib, bildirilgan ishonch uchun Namangan viloyat hokimi Xayrulla Hayitbayevich Bozarovga minnatdorchilik bildirib, o‘ziga bildirilgan ishonchni oqlash uchun qo‘lidan kelgancha mehnat qilishini ta’kidladi.
So‘ngra, Namangan viloyat futbol assosiasiyasi yangi vise-prezidenti Shamshod Sarikov “Navbahor” PFK rahbariyati va ishchi – xodimlari, shuningdek, “Markaziy” o‘yingoh rahbariyati hamda xodimlari, bundan tashqari, "Navbahor" jamoasi muxlislari ishtirokida yig‘ilish o‘tkazdi. Unda tashkiliy masala ko‘rildi. Unga ko‘ra, shu kungacha “Navbahor” PFK direktori vazifasida ishlagan Baxtiyor Boboyev o‘z arizasiga ko‘ra, iste’foga chiqarilganligi ma’lum qilindi.
B.Boboyevning o‘rniga shu kungacha “Navbahor” PFK direktori birinchi o‘rinbosari lavozimida ishlab kelgan Ilhomjon Mirzaboyev vaqtinchalik “Navbahor” PFK direktori etib tayinlandi.
Shundan so‘ng, yig‘ilish o‘z yakuniga yetdi.
“Navbahor” PFK matbuot xizmati.
