O‘zbekiston milliy olimpiya qo‘mitasi prezidenti va O‘zbekiston futbol assosiasiyasi 1-vise-prezidenti Umid Ahmadjonov tashabbusi bilan Professional futbol ligasi 2019 yilgi mavsum uchun talablarni kuchaytirayotganidan xabaringiz bor. Kelasi yildan boshlab Superliganing har bir klubi o‘z akademiyasi faoliyatini yo‘lga qo‘yishi shart.

Kuni kecha Portugaliyaning “Portu” futbol klubi akademiyasi bilan yaqindan hamkorlik qilish bo‘yicha kelishuvga erishilgandi. Endilikda O‘zbekiston klublari dunyoga mashhur Gollandiyaning “Ayaks” klubi akademiyasi bilan ham hamkorlik qilish imkoniyatiga ega bo‘lishadi.

“So‘g‘diyona”, “Qo‘qon-1912”, “Metallurg”, “Paxtakor” hamda “Qizilqum” klublari texnik direktorlari ayni paytda Amsterdamda bo‘lib, “Ayaks” klubi akademiyasining ish faoliyati, seleksiya jarayonlari bilan yaqindan tanishishmoqda. Kecha “Ayaks” akademiyasi faoliyatiga mas’ul Mark van der Slot hamda skauting tizimi rahbari Kazimir Vesterfeld yosh futbolchining 8 yoshdan 17 yoshga qadar qanday tarbiyalanishi xususida kichik seminar o‘tkazishdi. Seminar mobaynida “Ayaks” akademiyasiga qabul qilingan yosh iste’dodning katta jamoa tarkibiga borib qo‘shilguniga qadar qanday bosqichlarda tarbiyalanishi borasida batafsil ma’lumot berildi. Shuningdek, “Ayaks”ning U-23 jamoasi mashg‘ulot jarayoni birgalikda kuzatildi.

Bugun tashrifning ikkinchi kuni doirasida o‘zbek klublari vakillariga “Ayaks” akademiyasi tizimida yosh futbolchilarni tarbiyalashda qo‘llaniladigan o‘ziga xos jihatlar haqida ma’lumot berildi. Anchagina do‘stona ruhda o‘tgan seminar jarayonida har ikki tomon vakillari bir-biriga o‘zlarini qiziqtirgan savollar bilan murojaat qilishdi va ikkala mamlakat futboli xususida atroflicha ma’lumotga ega bo‘lishdi.

O‘zbekistonlik mutaxassislar jahon futboliga ajoyib iqtidorlar yetishtirib bergan “Ayaks” akademiyasi hodimlari tajribasidan yurtimiz futboli ertalarini tarbiyalashda albatta foydalanishlarini ta’kidlashdi.