Pepsi Superliga 19-turi doirasida Namanganning “Navbahor” klubi o‘z maydonida Toshkentning “Paxtakor” jamoasini qabul qiladi.
Superliga (oliy liga)mizning muntazam ishtirokchisi bo‘lgan mazkur klublarning o‘zaro uchrashuvlari tarixiga nazar tashlaydigan bo‘lsak, jamoalar hozirgacha 53 marta o‘zaro ro‘baro‘ kelishgan. O‘zaro o‘yinlar bo‘yicha ustunlik poytaxtliklar tarafida. O‘tkazilgan ushbu bahslarning 35tasida “sherlar” zafar quchishgan bo‘lsa, 12ta o‘yinda “lochinlar” g‘alaba qozonishgan, 6ta uchrashuvda esa durang qayd etilgan. “Navbahor” “Paxtakor” darvozasiga 39ta gol urib, o‘z darvozasidan 92ta to‘p o‘tkazib yuborgan.
Ayni paytgacha Namanganda bo‘lib o‘tgan 26ta bahsning 11tasida “lochinlar” g‘alaba qozonishgan bo‘lsa, yana 11tasida toshkentliklar zafar quchishgan, 4ta o‘yinda esa durang qayd etilgan.
Ushbu jamoalarning o‘zaro o‘yinlari tarixida qayd etilgan eng yirik hisob - 7:0. Ushbu hisob 2009 yili Toshkentda bo‘lib o‘tgan uchrashuvda qayd etilib, unda “Paxtakor” zafar quchgandi.
Mazkur klublarning joriy mavsumning 1-davrasida Toshkentda o‘tkazilgan bahsida poytaxtliklar Tiago Bezerraning yagona goli evaziga 1:0 hisobida g‘alaba qozonishgandi.
Pepsi Superliga 19-turi doirasidagi “Navbahor” – “Paxtakor” uchrashuvi Namangan shahridagi “Markaziy” o‘yingohda soat 20:00da start oladi.
Mazkur o‘yinni yaqinda Rossiyada bo‘lib o‘tgan JCH-2018 musobaqasida 2ta uchrashuvni boshqargan bahraynlik Navaf Shukrulla boshchiligidagi hakamlar brigadasi boshqaradi.
“Navbahor” PFK matbuot xizmati.
