Pepsi Суперлига 19-тури доирасида Наманганнинг “Навбаҳор” клуби ўз майдонида Тошкентнинг “Пахтакор” жамоасини қабул қилади.
Суперлига (олий лига)мизнинг мунтазам иштирокчиси бўлган мазкур клубларнинг ўзаро учрашувлари тарихига назар ташлайдиган бўлсак, жамоалар ҳозиргача 53 марта ўзаро рўбарў келишган. Ўзаро ўйинлар бўйича устунлик пойтахтликлар тарафида. Ўтказилган ушбу баҳсларнинг 35тасида “шерлар” зафар қучишган бўлса, 12та ўйинда “лочинлар” ғалаба қозонишган, 6та учрашувда эса дуранг қайд этилган. “Навбаҳор” “Пахтакор” дарвозасига 39та гол уриб, ўз дарвозасидан 92та тўп ўтказиб юборган.
Айни пайтгача Наманганда бўлиб ўтган 26та баҳснинг 11тасида “лочинлар” ғалаба қозонишган бўлса, яна 11тасида тошкентликлар зафар қучишган, 4та ўйинда эса дуранг қайд этилган.
Ушбу жамоаларнинг ўзаро ўйинлари тарихида қайд этилган энг йирик ҳисоб - 7:0. Ушбу ҳисоб 2009 йили Тошкентда бўлиб ўтган учрашувда қайд этилиб, унда “Пахтакор” зафар қучганди.
Мазкур клубларнинг жорий мавсумнинг 1-даврасида Тошкентда ўтказилган баҳсида пойтахтликлар Тиаго Безерранинг ягона голи эвазига 1:0 ҳисобида ғалаба қозонишганди.
Pepsi Суперлига 19-тури доирасидаги “Навбаҳор” – “Пахтакор” учрашуви Наманган шаҳридаги “Марказий” ўйингоҳда соат 20:00да старт олади.
Мазкур ўйинни яқинда Россияда бўлиб ўтган ЖЧ-2018 мусобақасида 2та учрашувни бошқарган баҳрайнлик Наваф Шукрулла бошчилигидаги ҳакамлар бригадаси бошқаради.
“Навбаҳор” ПФК матбуот хизмати.
