Futbolda bosh bilan o‘ynash miya chayqalishiga sabab bo‘lishini mutaxassislar yaxshi bilishadi. Buning oqibati esa ayollar uchun erkaklarga qaraganda besh karra yomonroq, deyiladi «Radiology» jurnalida berilgan maqolada.
Mazkur tadqiqot bilan shug‘ullangan Nyu-Yorkdagi Eynshteyn tibbiyot kolleji xodimi Maykl Lipton shunday deydi:
«Vrachlar va olimlar boshdan olingan jarohat erkaklarga qaraganda ayollarda og‘irroq o‘tishini payqashganiga ancha bo‘lgan. Avvaliga bu shunchaki ayollarning ojizaligiga bog‘lanardi, chunki indamas erkaklardan farqli o‘laroq, ular dardini doston qilishiga o‘rganganmiz. Biz ayollar miyasidagi real o‘zgarishlarni o‘rgandik, haqiqatan ham ayollarda miya chayqalishi erkaklarnikiga qaraganda kuchliroq yuz berarkan».
Bosh miya chayqalishi bugungi kunda gandboldan tortib amerika futboli va xokkeygacha — barcha sport turlari bilan shug‘ullanuvchilar orasida eng ommalashgan jarohatlar sirasiga kiradi. Albatta, bundan aql o‘tmaslashib yoki xotira susayib qolmaydi, biroq qattiq bosh og‘riqlari va boshqa asoratlari borki, ko‘plab sportchilar o‘z faoliyatini erta yakunlashga majbur bo‘ladilar.
