Superliganing 21-turidan o‘rin olgan "Nasaf" - "Bunyodkor" (1:4) uchrashuvidan so‘ng "Bunyodkor" ustozi Mirjalol Qosimov o‘yin borasida o‘z fikrlarini bildirib o‘tdi.
"Qarshida "Nasaf"ga qarshi doimo qiziqarli o‘yin bo‘ladi. Bu o‘yinda ham ko‘plab vaziyatlar bo‘ldi, gollar kiritildi. Bizga omad kulib boqdi. Agar penaltini darvozabonz qaytara olmaganida o‘yin qanday kechar edi, bilmayman.
Maqsadimiz chiroyli o‘yin ko‘rsatib, muxlislarni xursand etish. Ochkoni kuzda sanaymiz, g‘oliblikka kuchimiz yetadi va yigitlarim bunga haqli.
"Nasaf" ham yomon o‘yin ko‘rsatmadi. Boya aytganimdek omad ko‘proq biz tarafda bo‘ldi. Menimcha, murabbiy hech qachon jamoadan 100 % qoniqish hosil qilmaydi. Negaki, o‘yin davomida baribir qandaydir xatolar uchrab turadi.
"Bunyodkor" saqlab qolinishi kerak. O‘zbek futboli uchun yaxshi futbolchilar yetishtirib bermoqda. Qolaversa, klub akademiyasida mingga yaqin bolakaylar futbol sir-asrorlarini o‘rganishmoqda. Umid qilamanki, klubning umri uzoq bo‘ladi", - dedi Qosimov.
