O‘zbekiston milliy terma jamoasi shu yilning sentyabr oyidagi FIFA kunlarida Suriya va Eron milliy terma jamoalariga qarshi o‘rtoqlik o‘yini o‘tkazishi haqida avval xabar berib o‘tgandik. Mazkur o‘rtoqlik o‘yinlari uchun akkreditasiya jarayoni boshlanganini ma’lum qilamiz.
O‘zbekiston professional futbol ligasining Superliga o‘yinlariga kirish huquqini beruvchi akkreditasiyasiga ega bo‘lgan jurnalistlar Suriya va Eronga qarshi o‘rtoqlik o‘yinlari uchun akkreditasiyaga hujjat topshirishlari shart emas. Ular O‘zbekiston – Suriya uchrashuvidan oldin tashkil qilinadigan matbuot anjumanida PFL akkreditasiyasini ko‘rsatgan holda o‘rtoqlik o‘yinlari uchun chiqarilgan akkreditasiyani olishlari mumkin.
PFL akkreditasiyasiga ega bo‘lmagan, ammo o‘rtoqlik uchrashuvlarini bevosita stadionning o‘zida yoritishni maqsad qilgan barcha turdagi OAV vakillari o‘z tashkilotlari nomidan rasmiy blankadagi xatni va jurnalistlar ro‘yxatini 1 sentyabr kuniga qadar O‘FA matbuot xizmati elektron pochtasiga (info@ufa.uz) jo‘natishlari talab etiladi.
