O‘zbekiston futbol assosiasiyasi mutaxassislari guruhi futbol bo‘yicha 2018 yilgi jahon chempionati mezboni Rossiyaga jo‘nab ketdi. U yerda mutaxassislarimiz Rossiya futbol uyushmasi, Rossiyadagi sport huquqshunosligi bo‘yicha faoliyat yuritayotgan kompaniyalar faoliyatini o‘rganishadi hamda ular bilan hamkorlik o‘rnatish bo‘yicha muzokaralarda ishtirok etishadi. 

Bundan maqsad, O‘zbekiston futbol assosiasiyasi tarkibidagi futbol faoliyatini nazorat qilish boshqarmasiga  kelishilgan o‘yinlarni aniqlash va ularning oldini olish, futbolchilar, murabbiylar, xodimlar mehnat shartnomasidagi muammoli vaziyatlarni hal etish, futbolni  moliyalashtirishni to‘g‘ri tashkil qilish va  ichki auditorlik tekshiruvlarni o‘tkazish ishlarida yuqorida nomlari qayd etilgan tashkilotlar tajribasini joriy qilishdir.

Rossiya safaridan so‘ng, oktyabr oyida mazkur soha bo‘yicha FIFA sammiti tashkil etiladi. O‘zbekiston futbol assosiasiyasi vakillari ishtirok etadigan ushbu sammitda Shveysariyaning sport huquqshunosligi kompaniyalari va firmalari bilan uchrashuvlar tashkil etilib, o‘zaro hamkorlikni masalalari muhokama qilinadi.