Bugun bo‘lib o‘tgan “Qo‘qon-1912” – “Nasaf” (1:1) uchrashuvidan so‘ng matbuot anjumani bo‘lib o‘tdi.

Matbuot anjumanining dastlabki qismida mehmonlar bosh murabbiyi Ro‘ziqul Berdiyev ishtirok etdi.

“Bugun ochiq o‘yin bo‘ldi. Har ikki jamoada ham golga tortadigan vaziyatlar ko‘p bo‘ldi. Bugungi rejamiz asosan himoyaga e’tibor qilib,  qarshi hujumda o‘ynash edi. Penalti bo‘lgan vaziyat ham qarshi hujum mevasi edi.

So‘nggi daqiqalarda Sharof Muhiddinov vaziyatdan foydalanganda g‘alaba qozonishimiz ham mumkin edi.

Bobur Davlatov penaltini aniq amalga oshira olmagan bo‘lsa-da, bugun yaxshi o‘ynadi. Lekin uning salohiyati yuqori. O‘yindan oldingi mashg‘ulotlarda Bobur Davlatov penaltilarni yaxshi tepgani bois bugun unga ishonch bildirgandik.

Lekin bu safar uning omadi kelmadi. Yana shuni qo‘shimcha qilish mumkinki, “Qo‘qon-1912” jamoasi bilan hamisha o‘yinlarimiz ochiq va qiziqarli bo‘ladi.

Har ikki jamoa hujumkor o‘yin ko‘rsatadi. Menimcha o‘yin muxlislarga manzur bo‘ldi”, - deydi Berdiyev.