“Manchester Yunayted” Angliya liga kubogida “Derbi Kaunti”ga kutilmaganda yutqazib, musobaqani tark etdi. Mazkur mag‘lubiyatdan so‘ng #MourinhoOut xeshtegi Twitter’da trendga chiqdi. Shuningdek, ijtimoiy tarmoq trendida bir vaqtning o‘zida ushbu uchrashuvga doir yana 3 ta: #DerbyCounty, #Lampard, #SergioRomero xeshteglarini ko‘rish mumkin.
Ta’kidlash joizki, “MYU” 59-daqiqaga qadar hisobda oldinda borayotgan edi, ammo “Liverpul”dan ijaraga olingan Xarri Uilson jarima zarbasini qoyilmaqom tarzda bajarib, hisobni tenglashtirdi.
“Derbi” so‘ngra 85-daqiqada hisobda oldinga chiqib oldi. Maruan Fellaynining qo‘shib berilgan daqiqalarda urgan goli evaziga “Yunayted”da umid qayta uyg‘ongan edi. Ammo penaltilar seriyasida Frenk Lempard, jamoasi omadli ishtirok etib, “Old Trafford”da sensasiyali g‘alabaga erishdi.
