O‘zbekiston futbol assosiasiyasining 1-vise prezidenti Umid Ahmadjonovning tashabbusi bilan "Real Madrid" klubi akademiyasi va O‘FA o‘rtasida tuzilgan kelishuvga asosan madridlik mutaxassislar tomonidan tanlab olingan 22 nafar bola Real Madrid Foundation Clinic dasturi bo‘yicha master klasslarda ishtirok etib, tajribalarini oshirish maqsadida Ispaniyaning Madrid shahriga jo‘nab ketgani haqida xabar bergan edik.
Kecha yosh futbolchilarimiz “Real” klubi akademiyasida dastlabki mashg‘ulotlarni o‘tkazishdi. Mashg‘ulotlar quvnoq kayfiyatda o‘tib, futbolchilarimiz xorijlik mutaxassislardan o‘ziga xos master-klass olishganini alohida ta’kidlab o‘tish kerak.
Bugun mashg‘ulotlar davom ettirildi. Madrid klubi akademiyasi murabbiylari o‘zbekistonlik bolalarga maydonda pozisiyalar bo‘ylab joylashuv, standart vaziyatlar, bosh bilan o‘ynash kabi turli usullarni mashq qilishdi. Xorijlik murabbiylar qo‘l ostida shug‘ullanayotgan futbolchilarimiz murabbiylar ko‘rsatmalarini astoyidil bajarishayotganini ham ta’kidlash zarur. Akademiya rahbariyati tomonidan yurtdoshlarimiz uchun alohida avtobus ajratilgan.
Shuningdek, safar davomida “Real” Madrid klubi muzeyi hamda stadioniga tashrif, mashhur futbolchilar bilan uchrashuvlar kabi tadbirlar ham rejaga kiritilgan. 
