Ўзбекистон футбол ассоциациясининг 1-вице президенти Умид Аҳмаджоновнинг ташаббуси билан "Реал Мадрид" клуби академияси ва ЎФА ўртасида тузилган келишувга асосан мадридлик мутахассислар томонидан танлаб олинган 22 нафар бола Real Madrid Foundation Clinic дастури бўйича мастер классларда иштирок этиб, тажрибаларини ошириш мақсадида Испаниянинг Мадрид шаҳрига жўнаб кетгани ҳақида хабар берган эдик.
Кеча ёш футболчиларимиз “Реал” клуби академиясида дастлабки машғулотларни ўтказишди. Машғулотлар қувноқ кайфиятда ўтиб, футболчиларимиз хорижлик мутахассислардан ўзига хос мастер-класс олишганини алоҳида таъкидлаб ўтиш керак.
Бугун машғулотлар давом эттирилди. Мадрид клуби академияси мураббийлари ўзбекистонлик болаларга майдонда позициялар бўйлаб жойлашув, стандарт вазиятлар, бош билан ўйнаш каби турли усулларни машқ қилишди. Хорижлик мураббийлар қўл остида шуғулланаётган футболчиларимиз мураббийлар кўрсатмаларини астойидил бажаришаётганини ҳам таъкидлаш зарур. Академия раҳбарияти томонидан юртдошларимиз учун алоҳида автобус ажратилган.
Шунингдек, сафар давомида “Реал” Мадрид клуби музейи ҳамда стадионига ташриф, машҳур футболчилар билан учрашувлар каби тадбирлар ҳам режага киритилган. 
