O‘smirlar Olimpiya o‘yinlarining dzyudo bo‘yicha bahslarida bronza medalini qo‘lga kiritgan Nilufar Yermagambetovaning murabbiyi Ulug‘bek Azizov ham sportchining ishtiroki borasida o‘z fikrlarini bildirib o‘tdi.
“Musobaqaga albatta jiddiy tayyorgarlik ko‘rgandik. Texnik va taktik yo‘nalishda ham ish olib bordik. Nilufar yarim finalda Mo‘g‘uliston terma jamoasi vakilasiga mag‘lub bo‘ldi va finalga chiqa olmadi. To‘g‘risini aytsam, u mazkur bahsda g‘alaba qozonishiga 80 foiz ishongandim. Chunki, ular avval ham to‘qnash kelishgan.
Afsuski, Nilufar bosimni yengib o‘ta olmadi. Olimpiya o‘yinlari umuman boshqa saviyadagi musobaqa hisoblanadi. Bu yerda ko‘plab mamlakatlardan sportchilar ishtirok etishadi. Va albatta har bir sportchi oltin medalni qo‘lga kiritishni orzu qiladi. Biroq, kuchli uchlikka kirish ham ajoyib natija. Biz navbatdagi musobaqalarda yurtimiz bayrog‘ini yanada ko‘klarga ko‘tarmoqchimiz. Fursatdan foydalanib, qo‘llab-quvvatlaganliklari uchun O‘zbekiston Milliy olimpiya qo‘mitasi va O‘zbekiston dzyudo federasiyasiga minnatdorchilik bildiraman”, – dedi Ulug‘bek Azizov.
