Turinning Yuventus klubi hujumchisi Krishtianu Ronaldu jurnalistlarga o‘zining yangi, qiymati 1,6 mln AQSH dollarini tashkil qiladigan soatini ko‘z-ko‘z qildi.

Futbolchining bu qimmatbaho soati Yevropa Chempionlar ligasining 3-turidan o‘rin olgan Manchester Yunaytedga qarshi uchrashuvdan oldin tashkil etilgan matbuot anjumani vaqtida hammaning e’tiboriga tushgan. Ronaldu tadbirga aynan shu soatni taqib kelgani aytilmoqda.

Britaniya matbuoti xabariga ko‘ra, Ronalduning bu soati shveysariyalik soatsozlar tomonidan tayyorlangan bo‘lib, unga oq va alvon rangdagi brilliantlar terib chiqilgan. Qayd qilinishicha, bunga qadar Ronaldu narxi 130 ming dollar atrofida bo‘lgan amerikancha soat taqib yurgan.

Ma’lumotlarga ko‘ra, bu sport olamidagi eng qimmatbaho soat emas. Bir qancha vaqt muqaddam mashhur bokschi sotib olgan soat narxi 18 mln dollarni tashkil qilgan.