Туриннинг Ювентус клуби ҳужумчиси Криштиану Роналду журналистларга ўзининг янги, қиймати 1,6 млн АҚШ долларини ташкил қиладиган соатини кўз-кўз қилди.
Футболчининг бу қимматбаҳо соати Европа Чемпионлар лигасининг 3-туридан ўрин олган Манчестер Юнайтедга қарши учрашувдан олдин ташкил этилган матбуот анжумани вақтида ҳамманинг эътиборига тушган. Роналду тадбирга айнан шу соатни тақиб келгани айтилмоқда.
Британия матбуоти хабарига кўра, Роналдунинг бу соати швейцариялик соатсозлар томонидан тайёрланган бўлиб, унга оқ ва алвон рангдаги бриллиантлар териб чиқилган. Қайд қилинишича, бунга қадар Роналду нархи 130 минг доллар атрофида бўлган американча соат тақиб юрган.
Маълумотларга кўра, бу спорт оламидаги энг қимматбаҳо соат эмас. Бир қанча вақт муқаддам машҳур боксчи сотиб олган соат нархи 18 млн долларни ташкил қилган.
