Xabaringiz bor, joriy yildan e’tiboran O‘zbekiston Professional futbol ligasi dunyoning eng kuchli ligalaridan biri – La liga bilan yaqindan hamkorlik qilmoqda.

Jahondagi yetakchi ligalardan biri bilan imzolangan hamkorlik to‘g‘risidagi memorandumga asosan bir qator loyihalar amalga oshirila boshlandi. 

Jumladan, 28 oktyabr kuni poytaxtimizdagi “Milliy” stadionda mamlakatimizda ilk marta “Ommaviy El Klasiko” tomoshasi bo‘lib o‘tdi. Futbol targ‘ibotini kuchaytirish, yoshlarni futbolga qiziqishini orttirish, jahon futboli yulduzini va La liga kubogini yaqindan tomosha qilish imkonini yaratish maqsadida tashkil etilgan ushbu tadbir doirasida Temur Kapadze boshchiligidagi “Real Madrid” hamda Luis Garsiya boshchiligidagi “Barselona” o‘zaro ko‘rgazmali o‘yinda ishtirok etishdi. 

Shu kuni “Barselona” safida maydonga tushgan Azamat Abduraimov ushbu tadbir haqida quyidagicha fikr bildirib o‘tdi: 

- “Ommaviy El Klasiko” tomoshasi juda ajoyib tarzda o‘tdi. Tadbirga juda ko‘plab muxlislar tashrif buyurdi. Chin ma’nodagi futbol bayrami bo‘ldi. Umid qilamanki, ishqibozlarga biz futbol faxriylari o‘rtasida o‘tgan ko‘rgazmali uchrashuv ham ma’qul keldi. Jamoalar naqd 8 tadan gol urib, durang qayd etishdi. Bunaqasi haqiqiy “El Klasiko”da ham bo‘lmagan hali. Qolaversa, Luis Garsiya bilan bir jamoada o‘ynash juda maroqli bo‘ldi. U bilan maydonda tez “til topishib” ketdik. U haqiqiy professional, o‘z ishining ustasi. Stadiondagi atmosfera ham xuddi katta futbol shoularidagidek bo‘lganini ta’kidlay olaman. So‘ngra birinchi marta katta ekranda futbol tomosha qildik. Barchasi ajoyib tarzda o‘tdi. PFL va La liganing kelgusi loyihalarida omad tilayman, - dedi yaqin o‘tmishning mashxur futbolchilaridan biri.