Havaskor boks xalqaro federasiyasi (AIBA) prezidentligiga saylovda qozog‘istonlik sobiq bokschi Serik Qo‘noqboyev G‘ofur Rahimovga raqib bo‘ladi. Saylov yaqin kunlarda Moskvada bo‘lib o‘tishi rejalashtirilgan.
Oldinroq Xalqaro olimpiya qo‘mitasi (XOQ) G‘ofur Rahimovning Havaskor boks xalqaro federasiyasi (AIBA) prezidentligiga saylovda yagona nomzod ekanligiga e’tiroz bildirgan edi.
G‘ofur Rahimov Havaskor boks xalqaro federasiyasi (AIBA) boshqaruvida yuzaga kelgan inqiroz tufayli 2018 yil yanvaridan vaqtinchalik prezident vazifasini bajarib kelmoqda. Biroq XOQ uni jinoyat olamiga aloqasi bor, deya nomzodini yoqlamasligini bildirgan edi. Shuningdek, XOQ federasiyaga keskin jazolar ko‘rishi bilan tahdid qilgan edi.
Ammo so‘nggi vaziyatda Osiyo boks konfederasiyasini boshqarayotgan qozog‘istonlik sobiq bokschi Serik Qo‘noqboyevning mazkur saylovda nomzod sifatida ishtirok etishi vaziyatni bir oz yumshatdi. Sport arbitraj sudi (CAS) Qo‘noqboyevga Havaskor boks xalqaro federasiyasi (AIBA) prezidentligiga o‘z nomzodini qo‘yishi mumkinligi haqida qaror chiqardi.
Bundan oldin mazkur federasiyaning saylovni tashkil etish bilan shug‘ullanuvchi qo‘mitasi Qo‘noqboyevga saylovda ishtirok etishiga ruxsat bermagandi. Sabab sifatida uning hujjatlarni o‘z vaqtida taqdim etmaganligi keltirilgan edi.
Natijada G‘ofur Rahimovning yagona nomzod bo‘lib qolishi mazkur federasiya va XOQ o‘rtasida nizo keltirib chiqardi.
Saylovlarning muqobillik asosida o‘tishi bilan Havaskor boks xalqaro federasiyasi (AIBA) 2020 yilda Tokio shahrida bo‘lib o‘tadigan Olimpiya o‘yinlarida ishtirok etish imkoniyatini saqlab qoladi. Biroq XOQ “nomunosib” nomzod uchun Havaskor boks xalqaro federasiyasi (AIBA)ga nisbatan jazo choralarini qo‘llashini bildirdi.
