7 noyabr, chorshanba kuni futbol bo‘yicha Xitoy Superligasida 2018/19 yilgi mavsum chempioni nomi ma’lum bo‘ldi.

29-tur uchrashuvlari yakuniga ko‘ra, «Shanxay SIPG» jamoasi Xitoy chempionati g‘olibiga aylandi.

Superliga yakuniga 1 tur qolganda «Shanxay SIPG» «Shensi Chanba» jamoasini o‘z maydonida qabul qilib, 2:1 hisobida mag‘lub etishga erishdi.

Shanxayliklar tarkibida O‘zbekiston terma jamoasi sardori Odil Ahmedov gol kiritib, jamoasining g‘alabasiga o‘z hissasini qo‘shdi.

Ma’lumot uchun, o‘zbekistonlik futbolchi joriy mavsum «Shanxay SIPG» tarkibida Xitoy Superligasida 19 ta o‘yin o‘tkazdi.