Qoraqalpog‘iston Respublikasining Nukus shahrida “Orolbo‘yi hududlarida ekologik muhitni yaxshilash masalalari va bu jarayonda koreys diasporasining roli” mavzusida xalqaro forum bo‘lib o‘tmoqda. Mazkur forumda BMTning sobiq bosh kotibi Pan Gi Mun boshchiligidagi Janubiy Koreya delegasiyasi vakillari ishtirok etishmoqda.   Kecha Qoraqalpog‘iston Respublikasi Nukus xalqaro aeroportida Qoraqalpog‘iston Respublikasi Vazirlar Kengashi, O‘zbekiston futbol assosiasiyasi, Qoraqalpog‘iston futbol assosiasiyasi, Qoraqalpog‘iston bolalar-o‘smirlar futbol akademiyasi vakillari mehmonlarni ko‘tarinki ruhda kutib olishdi. Shundan so‘ng mehmonlar sharafiga dasturxon yozilib, san’atkorlar o‘z chiqishlari bilan yig‘ilganlarga yuqori kayfiyat baxsh etishdi.   Mehmonlar orasida Janubiy Koreyaning Seul shahridagi “Chung-Ang university high school” futbol jamoasi tashrif buyurgan. Mazkur jamoa bugun “Turon” markaziy o‘yingohida soat 14:00da Qoraqalpog‘iston Respublikasining U-19 yoshgacha bo‘lgan terma jamoasi bilan o‘rtoqlik uchrashuvini o‘tkazadi.    “Turon” markaziy o‘yingohida bo‘lajak o‘yindan avval katta gala konsert dasturi ham tashkil etiladi. Unda Maxset Utemuratov, Gulxatisha Ayimbetova, Irina Nam hamda Toshkent shahridan tashrif buyurgan estradamiz yulduzlari, qolaversa, Janubiy Koreya davlatidan tashrif buyurgan ansambl guruhlari o‘z chiqishlari bilan o‘yingohga tashrif buyurgan muxlislarni xushnud etishadi.    Bundan tashqari forum doirasida nufuzli mehmonlar hamda futbol jamoa a’zolari O‘zbekistonning diqqatga sazovor joylari va tarixiy obidalari bilan ham yaqindan tanishishni maqsad qilishgan.    “Chung-Ang university high school” jamoasi 28 noyabr kuni Toshkent shahridagi “Milliy” o‘yingohida O‘zbekiston milliy terma jamoasining 17 yoshgacha bo‘lgan o‘smirlar jamoasi bilan kuch sinashishadi va shundan so‘ng 29 noyabr kuni charter yo‘nalish orqali o‘z vatanlariga qaytib ketishadi.