Xabaringiz bor, Osiyo Futbol Konfederasiyasi 2019-2020 yillar uchun O‘zbekiston klublariga Osiyo Chempionlar Ligasida 1+2 ko‘rinishida kvotalar taqdim etgan.
“Lokomotiv” jamoasi mamlakat chempioni sifatida kelasi yili qit’a Chempionlar ligasining guruh bosqichidan ishtirokini boshlaydi. “Paxtakor” va AGMK esa saralash bosqichidan boshlab ushbu nufuzli musobaqada qatnashadi.
Qayd etish joizki, OFK 2021-2022 yillar uchun musobaqa taqvimini ishlab chiqish ishlarini boshlab yubordi.
Bugun Ummon Sultonligi poytaxti Maskat shahrida OCHLda jamoalari ishtirok etuvchi 10 ta etakchi mamlakat – Avstraliya, Xitoy, Yaponiya, Janubiy Koreya, Tailand, Eron, Qatar, Saudiya Arabistoni, BAA va O‘zbekiston professional futbol ligalari bosh direktorlaridan iborat maxsus komissiya ish boshladi.
Komissiya 2021-2022 mavsumlar uchun OFK klublar o‘rtasidagi musobaqalari taqvimini tuzish bo‘yicha takliflarni muhokama etadi. Mazkur komissiya yig‘ilishida O‘zbekiston Professional Futbol Ligasi bosh direktori – Omon G‘ofurov ham ishtirok etmoqda.
Ta’kidlash joiz, ishchi komissiya a’zolari ertaga Maskatda tashkil etiladigan OFKning yil yakunlariga bag‘ishlangan taqdirlash marosimida ham qatnashishi ko‘zda tutilgan.
