Metallurg – Buxoro jamoalari uchrashuvidan keyin har ikkala jamoa murabbiylari o‘yin haqidagi fikrlarini bildirib o‘tdi.

Matbuot anjumanining ikkinchi qismida Metallurg jamoasi bosh murabbiyi Andrey Shipilov ishtirok etdi.

- Juda qiziqarli va tomoshabop o‘yinning guvohi bo‘ldik. Garchi bu o‘yin natijasi hech narsani hal etmasada yigitlarim professionalliklarini isbotlashdi. Oxirigacha kurashishdi va chiroyli g‘alabalari bilan mavsumga nuqta qo‘yishdi. Chempionatni ko‘tarinki kayfiyatda yakunladik,  buning uchun ularga rahmat. Zero biz mo‘’jazgina metallurglar shahri fuqarolari uchun o‘ynayotganligimizni,  ularning quvonchi futbol ekanligini unutmasligimiz lozim.

Bevosita mavsum haqida gapiradigan bo‘lsam,  chempionatni ko‘tarinki ruhda o‘tkazdik. Mavsum avvalida shov shuv qilmadik,  kamtarona bahsga kirishdik. Muassislarimiz tomonidan zimmamizga yuklangan vazifalarni bosqichma bosqich bajarib bordik. Kuchli oltilikka kirishimiz lozim edi,  biz beshinchi pog‘onadan joy oldik. Jamoa tarixidagi eng yaxshi  ko‘rsatkichni takrorladik. Jamoamiz muvaffaqiyatida sodiq muxlislarimizning ham hissasi katta bo‘ldi. Ulardan ham  minnatdormiz.

Endi futbolchilarga dam beramiz. O‘zimiz esa keyingi mavsum haqida o‘ylaymiz, - deydi Andrey Sergeevich.