Металлург – Бухоро жамоалари учрашувидан кейин ҳар иккала жамоа мураббийлари ўйин ҳақидаги фикрларини билдириб ўтди.
Матбуот анжуманининг иккинчи қисмида Металлург жамоаси бош мураббийи Андрей Шипилов иштирок этди.
- Жуда қизиқарли ва томошабоп ўйиннинг гувоҳи бўлдик. Гарчи бу ўйин натижаси ҳеч нарсани ҳал этмасада йигитларим профессионалликларини исботлашди. Охиригача курашишди ва чиройли ғалабалари билан мавсумга нуқта қўйишди. Чемпионатни кўтаринки кайфиятда якунладик, бунинг учун уларга раҳмат. Зеро биз мўъжазгина металлурглар шаҳри фуқаролари учун ўйнаётганлигимизни, уларнинг қувончи футбол эканлигини унутмаслигимиз лозим.
Бевосита мавсум ҳақида гапирадиган бўлсам, чемпионатни кўтаринки руҳда ўтказдик. Мавсум аввалида шов шув қилмадик, камтарона баҳсга киришдик. Муассисларимиз томонидан зиммамизга юкланган вазифаларни босқичма босқич бажариб бордик. Кучли олтиликка киришимиз лозим эди, биз бешинчи поғонадан жой олдик. Жамоа тарихидаги энг яхши кўрсаткични такрорладик. Жамоамиз муваффақиятида содиқ мухлисларимизнинг ҳам ҳиссаси катта бўлди. Улардан ҳам миннатдормиз.
Энди футболчиларга дам берамиз. Ўзимиз эса кейинги мавсум ҳақида ўйлаймиз, - дейди Андрей Сергеевич.
