Keling yakuniga yetgan mavsumda "Bunyodkor" klubi qanday natijalar qayd etganiga bir e’tibor qaratsak.
Mavsum davomida sovrinli o‘rinlar uchun kurash olib borgan Mirjalol Qosimov shogirdlari ushbu mavsumni turli sabablarga ko‘ra to‘rtinchi o‘rinda yakunladi. 32 ta tur o‘yinida maydonga tushgan "qaldirg‘ochlar" jami 61 ochko jamg‘arishdi.
Raqiblar darvozasini 46 bor ishg‘ol qilgan jamoamiz a’zolari, o‘z darvozalaridan 38 marta to‘p olib chiqishga majbur bo‘lishdi. Har bir o‘yinda o‘rtacha 1.44 ta gol urildi.
32 o‘yindan 8 tasida "Bunyodkor" a’zolari o‘z darvozasi dahlsizligini ta’minlay olishdi. 6 o‘yinda esa raqiblar darvozasiga yo‘l topa olmadik.
Hakamlar 61 marta futbolchilarimizni ogohlantirishdi va uch marta "qaldirg‘ochlar"ni maydondan chetlatishdi.
Mirjalol Qosimov chempionat davomida 25 nafar futbolchi xizmatidan foydalandi. Ulardan bir nafari - Filip Rayevas legioner futbolchi, qolgan futbolchilarning barchasi mahalliy futbolchilar hisoblanadi. Klub futbolchilarining o‘rtacha yoshi 24.8 yosh. "Bunyodkor" safida harakat qilgan futbolchilardan eng yoshi kattasi Anvar G‘ofurov - 36 yosh (14.05.1982). Shuningdek, "Bunyodkor" a’zosi Jasur Jaloliddinov nafaqat klubimiz safida to‘p surgan eng yosh futbolchi, shu bilan birga chempionat tarixida debyut qilgan eng yosh futbolchi sifatida qay etildi. Chempionatning "Qo‘qon-1912" ga qarshi 20-turida maydonga chiqqanida Jasur Jaloliddinov 16 yosh 80 kunlik edi.
Jamoa a’zosi Murodjon Toshmatov o‘tgan 32 o‘yinning barchasida maydonga tushgan yagona futbolchi hisoblanadi. U chempionat daovmida 2646 daqiqa maydonda harakat qilgan.
Jamoamiz sardori Javlon Ibrohimov tarkibimizdagi hakamlar tomonidan eng ko‘p ogohlantirilgan (9 ta sariq kartochka) futbolchi bo‘lish bilan birga, "Bunyodkor"ning 2018 yildagi to‘purari (11 gol) bo‘lishga ham muvaffaq bo‘ldi.
"Bunyodkor" ushbu mavsumda eng yirik hisobda "Nasaf"ni mag‘lub etdi - 4-1 va eng yirik mag‘lubiyat "Paxtakor"dan qabul qilindi 0-4.
Muxlislar tashrifi borasida ham bu mavsum o‘tgan yilgiga qaraganda "Bunyodkor"da o‘sish kuzatilganini qayd etish lozim. Jamoamiz o‘yinlariga jami 309050 tomoshabin tashrif buyurdi. Bu o‘rtacha har bir o‘yinni stadiondan bevosita kuzatish uchun 9658 tomshabin tashrif buyurdi degani.
Yuqoridagi statistikadan ko‘rinib turibdiki, Mirjalol Qosimov shogirdlari o‘z an’analariga sodiq qolgan holda ortda qolgan mavsum davomida klub va uning atrofida ro‘y bergan turli voqelarga qaramasdan sovrinli o‘rinlar uchun astoydil kurash olib bordi. Shuni ishonch bilan ta’kidlaymizki, yangi mavsumda ham "qaldirg‘ochlar" yuksak marralar va sovrinli o‘rinlar uchun kurash olib boradi hamda o‘z o‘yinlari bilan muxlislarni xursand qilishda davom etadi.
Zero, "Bunyodkor" har doim muxlislar uchun o‘ynaydi!!!
