Bugun Milliy olimpiya qo‘mitasi “O‘zbekiston xalqaro anjumanlar saroyi”da o‘zbek sporti tarixida ilk marotaba “Milliy sport mukofoti – 2018” tantanali taqdirlash marosimi o‘tkazyapti. Marosimda turli nominasiyalar egasi taqdirlanishi kutilmoqda.
Jumladan, “Yilning eng yaxshi erkak sportchisi” sifatida Bekzod Abdurahmonov tan olindi. Sportchi ayni paytda xorijiy yig‘inda bo‘lgani sababli sovrinni MOQ rahbari Umid Ahmadjonov qo‘lidan O‘zbekiston sport kurashlari assosiasiyasi bosh kotibi Shuhrat Mamadaliyev qabul qilib oldi.
Avvalroq, “Yilning eng yaxshi ayol sportchisi” yo‘nalishida Osiyo o‘yinlarining uch karra chempioni, Osiyo o‘yinlari rekordchisi, yengil atletikachi Svetlana Radzivil g‘olib bo‘ldi.
o‘zbek boksi afsonasi, “Toshkent yo‘lbarsi”, jahon chempioni Rufat Rizqiyev “Sport sohasidagi ko‘p yillik xizmati uchun” taqdirlangan edi. “Yilning eng yaxshi murabbiyi” yo‘nalishda - boks bo‘yicha O‘zbekiston terma jamoasi bosh murabbiyi Marat Qurbonov g‘alaba qozondi.
“Yilning yosh va istiqbolli sportchisi” yo‘nalishida o‘smirlar Olimpiadasi g‘olibi, Osiyo va jahon chempioni Abdumalik Xalakov tengsiz bo‘ldi. “Yil kashfiyoti” yo‘nalishida og‘ir atletikachi, jahon chempionati g‘olibi Akbar Jo‘rayev g‘alaba qozondi.
“Sport” telekanali direktori Zohid Karimov “Eng yaxshi ijtimoiy loyihasi” – yo‘nalishida g‘olib bo‘ldi. “O‘zReport” telekanali direktori Ravshan Jo‘rayev “Sport sohasini rivojlantirishga qo‘shgan hissasi uchun” taqdirlandi.
Marina Yakubova “Yilning eng yaxshi sport jurnalisti” deb e’tirof etilgan bo‘lsa, “Yilning eng yaxshi paralimpiyachisi” - Pauerlifting bo‘yicha Paraosiyo o‘yinlari chempioni Ro‘za Qo‘ziyeva bo‘lgan edi. “Eng faol sport targ‘ibotchisi” yo‘nalishida MOQ Matbuot va media departamenti direktori Zafar Imomxo‘jayev taqdirlandi.
Jahon gimnastikasi afsonasi, Oksana Chusovitina “Xalqaro maydonlarda o‘zbek sportini targ‘ib qilgani uchun” taqdirlangan edi. “Eng yaxshi sport homiysi” sovrini O‘zbekiston Respublikasi Bosh vazirining birinchi o‘rinbosari Ochilboy Ramatovga topshirildi.
Andijon viloyati hokimi Shuhrat Abdurahmonov “Hududlarda sportni rivojlantirishga qo‘shgan hissasi uchun” taqdirlangan edi.
O‘zbekiston kurash federasiyasi esa “Yilning eng faol federasiyasi” deb e’tirof etildi. O‘zbekiston shaxmat federasiyasi “Yilning eng yaxshi innovasion va intellektual faol federasiyasi” deb e’tirof etildi.
