Joriy yilning 22-28 dekabr kunlari Singapurda gandbol bo‘yicha Janubiy-SHarqiy Osiyo ochiq chempionati musobaqasi o‘tkazildi. 21 yoshgacha bo‘lgan qizlar va yoshlar jamoalari o‘rtasida o‘tkazilayotgan musobaqada O‘zbekiston terma jamoalari ham ishtirok etishdi.
Dastlabki o‘yinlarda yoshlar jamoamiz Hindistonni 27:15, Malayziyani 40:15, Xitoy Taypeyni 36:11, Gongkongni 23:17 va mezbon Singapurni 47:15 hisobida mag‘lubiyatga uchratishdi. Bugun o‘tkazilgan final bahslarida Yaponiya jamoasiga qarshi kechgan bahslarda yigitlarimiz 23:26 hisobida imkoniyatni boy berishdi va ikkinchi o‘rinni qo‘lga kiritishdi.
Qizlarimiz esa musobaqa davomida o‘tkazilgan o‘yinlarda hindistonliklardan 24:20, Xitoy Taypeydan 20:13 va Singapur jamoasidan 30:15 hisobida ustun kelishdi. Bugun o‘tkazilgan final bahslarida ham o‘zbek qizlari Yaponiya jamoasini 29:22 hisobida mag‘lubiyatga uchratib chempionlikni qo‘lga kiritishdi.
Musobaqa yakunida qizlarimizdan Umida Xudayqulova “Eng yaxshi darvozabon”, Dilbar Baxromova “Eng yaxshi o‘yinchi” nominasiyasi bilan taqdirlangan bo‘lsa, yoshlarimizdan Sardor Elmurodov “Eng yaxshi darvozabon” va Suxrob Davronov “Eng yaxshi o‘yinchi” deb topildi.
