Жорий йилнинг 22-28 декабрь кунлари Сингапурда гандбол бўйича Жанубий-Шарқий Осиё очиқ чемпионати мусобақаси ўтказилди. 21 ёшгача бўлган қизлар ва ёшлар жамоалари ўртасида ўтказилаётган мусобақада Ўзбекистон терма жамоалари ҳам иштирок этишди.

Дастлабки ўйинларда ёшлар жамоамиз Ҳиндистонни 27:15, Малайзияни 40:15, Хитой Тайпейни 36:11, Гонгконгни 23:17 ва мезбон Сингапурни 47:15 ҳисобида мағлубиятга учратишди. Бугун ўтказилган финал баҳсларида Япония жамоасига қарши кечган баҳсларда йигитларимиз 23:26 ҳисобида имкониятни бой беришди ва иккинчи ўринни қўлга киритишди.

Қизларимиз эса мусобақа давомида ўтказилган ўйинларда ҳиндистонликлардан 24:20, Хитой Тайпейдан 20:13 ва Сингапур жамоасидан 30:15 ҳисобида устун келишди. Бугун ўтказилган финал баҳсларида ҳам ўзбек қизлари Япония жамоасини 29:22 ҳисобида мағлубиятга учратиб чемпионликни қўлга киритишди.

Мусобақа якунида қизларимиздан Умида Худайқулова “Энг яхши дарвозабон”, Дилбар Бахромова “Энг яхши ўйинчи” номинацияси билан тақдирланган бўлса, ёшларимиздан Сардор Элмуродов “Энг яхши дарвозабон” ва Сухроб Давронов “Энг яхши ўйинчи” деб топилди.